ആന്ധ്രയിൽ തദ്ദേശ തിരഞ്ഞെടുപ്പിൽ സിപിഐഎമ്മിന് നേട്ടം; 23 സീറ്റുകളിൽ വിജയം, വോട്ടുവിഹിതവും ഉയർന്നു

ആന്ധ്രപ്രദേശിലെ തദ്ദേശ സ്വയംഭരണ തിരഞ്ഞെടുപ്പിൽ ഭരണകക്ഷിയുടെ ഭീഷണികളും ക്രമക്കേടുകളും അതിജീവിച്ച് സിപിഐഎം നേട്ടമുണ്ടാക്കിയെന്ന് സംസ്ഥാന സെക്രട്ടറി വി. ശ്രീനിവാസ റാവു. വിശാഖപട്ടണം, വിജയവാഡ മുനിസിപ്പൽ കോർപറേഷനുകളിൽ ഓരോ കോർപറേറ്റർ സീറ്റും നാല് മുനിസിപ്പൽ കൗൺസിൽ സീറ്റുകളും ഒരു സഡ്പിടിസി സീറ്റും 15 എംപിടിസി സീറ്റുകളും പാർട്ടി നേടിയതായി അദ്ദേഹം അറിയിച്ചു. നവംബർ 10ന് മാധ്യമങ്ങളോട് സംസാരിക്കുകയായിരുന്നു അദ്ദേഹം.

ബൂത്ത് പിടിത്തം, കള്ളവോട്ട്, സ്ഥാനാർഥികളെയും പോളിങ് ഏജന്റുമാരെയും ബലമായി ബൂത്തുകളിൽനിന്ന് പുറത്താക്കൽ തുടങ്ങിയ ക്രമക്കേടുകൾ ഭരണകക്ഷി സഖ്യത്തിന്റെ പ്രവർത്തകർ നടത്തിയെന്ന് ശ്രീനിവാസ റാവു ആരോപിച്ചു. സംഭവങ്ങളിൽ പ്രതിഷേധിച്ച് നവംബർ 11ന് സംസ്ഥാനവ്യാപകമായി പ്രതിഷേധം സംഘടിപ്പിക്കുമെന്നും അദ്ദേഹം അറിയിച്ചു.

വോട്ടുവിഹിതം 8.2 ശതമാനമായി

തിരഞ്ഞെടുപ്പിൽ സിപിഐഎമ്മിന്റെ പ്രകടനം മെച്ചപ്പെട്ടതായും ശ്രീനിവാസ റാവു പറഞ്ഞു. 2021ൽ മത്സരിച്ച മണ്ഡലങ്ങളിൽ 7.4 ശതമാനമായിരുന്ന പാർട്ടിയുടെ വോട്ടുവിഹിതം ഇത്തവണ 8.2 ശതമാനമായി ഉയർന്നു. സമ്മർദങ്ങളും ഭീഷണികളും നിലനിന്നിട്ടും പാർട്ടിക്ക് വോട്ട് ചെയ്ത ജനങ്ങളോടും പ്രവർത്തകരോടും അദ്ദേഹം നന്ദി അറിയിച്ചു.

വരാനിരിക്കുന്ന പഞ്ചായത്ത് തിരഞ്ഞെടുപ്പുകളും 23 മുനിസിപ്പാലിറ്റികളിലേക്കുള്ള തിരഞ്ഞെടുപ്പും സ്വതന്ത്രവും നീതിപൂർവവുമായ രീതിയിൽ നടത്താൻ തിരഞ്ഞെടുപ്പ് കമ്മീഷൻ കർശന നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.

പൊലീസിനെതിരെയും ഭരണസഖ്യത്തിനെതിരെയും ആരോപണം

ടിഡിപി നേതൃത്വത്തിലുള്ള ഭരണസഖ്യത്തിന്റെ പ്രവർത്തകരിൽനിന്ന് സിപിഐഎം പ്രവർത്തകർ ആക്രമണവും പൊലീസിന്റെ ഭാഗത്തുനിന്ന് പീഡനവും നേരിട്ടതായി ശ്രീനിവാസ റാവു ആരോപിച്ചു. ഭരണകക്ഷി പ്രവർത്തകർ അക്രമം നടത്തിയപ്പോൾ പൊലീസ് നിശബ്ദ കാഴ്ചക്കാരായി നിന്നെന്നും ക്രമസമാധാനത്തിന്റെ പേരിൽ സിപിഐഎം സ്ഥാനാർഥികളെയും പ്രവർത്തകരെയും അറസ്റ്റ് ചെയ്തെന്നും അദ്ദേഹം കുറ്റപ്പെടുത്തി. തിരഞ്ഞെടുപ്പിൽ സിപിഐഎമ്മിന്റെ പങ്കാളിത്തം പോലും ഭരണകക്ഷിയെ അസ്വസ്ഥരാക്കുന്നുവെന്നും അദ്ദേഹം പറഞ്ഞു.

ഭരണസഖ്യത്തിന്റെ വിജയത്തിന് ജനങ്ങളുടെ അംഗീകാരമെന്ന മുഖ്യമന്ത്രി എൻ. ചന്ദ്രബാബു നായിഡുവിന്റെ അവകാശവാദത്തെയും അദ്ദേഹം വിമർശിച്ചു. തിരഞ്ഞെടുപ്പ് ക്രമക്കേടുകളും അക്രമങ്ങളും അവഗണിച്ച് ഫലത്തെ സർക്കാരിന്റെ ഭരണത്തിനുള്ള അംഗീകാരമായി ചിത്രീകരിക്കുന്നത് സ്വയം വഞ്ചനയാണെന്ന് അദ്ദേഹം പറഞ്ഞു. 2029ലെ തിരഞ്ഞെടുപ്പിൽ ജനങ്ങൾ ഉചിതമായ മറുപടി നൽകുമെന്നും ക്രമക്കേടുകൾക്ക് എന്നും തുടരാനാകില്ലെന്നും മുന്നറിയിപ്പ് നൽകി.

ആദിവാസി മേഖലകളിൽ സിപിഐഎമ്മിന് പിന്തുണ

അല്ലൂരി സീതാരാമ രാജു ജില്ലയിൽ ആദിവാസി വിഭാഗങ്ങൾ സിപിഐഎമ്മിനും പാർട്ടി നടത്തിയ സമരങ്ങൾക്കും പിന്തുണ നൽകിയതായി ശ്രീനിവാസ റാവു പറഞ്ഞു. ആദിവാസി ജനതയുടെ താൽപര്യങ്ങൾ സംരക്ഷിക്കാൻ പാർട്ടി തുടർന്നും പോരാടുമെന്നും അദ്ദേഹം വ്യക്തമാക്കി.

ആദിവാസി മേഖലകളിലെ പ്രശ്നങ്ങൾക്ക് മതപരിവർത്തനത്തെ കുറ്റപ്പെടുത്തുന്ന സമീപനം അപകടകരമാണെന്നും അദ്ദേഹം പറഞ്ഞു. ജിഒ 3 പുനഃസ്ഥാപിക്കാനും 1/70 നിയമം നടപ്പാക്കാനും സർക്കാർ നടപടി സ്വീകരിക്കാത്തത്, ഭൂമിയുടെ പട്ടയങ്ങൾ നൽകാത്തത്, പമ്പ്ഡ് സ്റ്റോറേജ് വൈദ്യുതിപദ്ധതികളും ബോക്സൈറ്റ് ഖനികളും കോർപറേറ്റുകൾക്ക് കൈമാറാനുള്ള നീക്കം എന്നിവയാണ് ആദിവാസികൾ നേരിടുന്ന പ്രധാന പ്രശ്നങ്ങളെന്നും അദ്ദേഹം ചൂണ്ടിക്കാട്ടി. ഇടതുപക്ഷ പാർട്ടികൾ തമ്മിലുള്ള ഐക്യം ശക്തിപ്പെടുത്തണമെന്നും അദ്ദേഹം ആഹ്വാനം ചെയ്തു.