Skip to main content
വാർത്തകൾ

അട്ടപ്പാടിയിലെ കുഞ്ഞുങ്ങളുടെ മരണം: കുടുംബങ്ങൾക്ക് 5 ലക്ഷം രൂപ ധനസഹായം നൽകണം; പിണറായി വിജയൻ

pinarayi vijayan

അട്ടപ്പാടിയിലെ ആരോഗ്യരംഗത്തെ സാഹചര്യം പരിതാപകരമാണെന്നും അവിടെനിന്ന് കേൾക്കുന്നത് വേദനാജനകമായ കഥകളാണെന്നും പ്രതിപക്ഷ നേതാവ് പിണറായി വിജയൻ. അട്ടപ്പാടിയിൽ മരിച്ച കുഞ്ഞുങ്ങളുടെ കുടുംബങ്ങൾക്ക് സർക്കാർ 5 ലക്ഷം രൂപ വീതം ധനസഹായം നൽകണമെന്നും ദുരിതത്തിലായ കുടുംബങ്ങളെ ചേർത്തുപിടിക്കാൻ സർക്കാർ തയ്യാറാകണമെന്നും അദ്ദേഹം ആവശ്യപ്പെട്ടു.

കുഞ്ഞുങ്ങളുടെ മരണവുമായി ബന്ധപ്പെട്ട് മാതാപിതാക്കളുമായി സംസാരിച്ചെന്നും വേദന കാരണം സംസാരിക്കാൻ പോലും കഴിയാത്ത അവസ്ഥയിലായിരുന്നു അവരെന്നും പിണറായി വിജയൻ പറഞ്ഞു. ഇനിയൊരു കുഞ്ഞും ജനിച്ചയുടൻ മരിക്കുന്ന സാഹചര്യം ഉണ്ടാകാതിരിക്കാൻ സർക്കാർ അടിയന്തരവും കൃത്യവുമായ നടപടികൾ സ്വീകരിക്കണമെന്നും അട്ടപ്പാടിയിലെ സന്ദർശനത്തിനിടെ മാധ്യമങ്ങളോട് സംസാരിക്കവെ അദ്ദേഹം ആവശ്യപ്പെട്ടു.

അമ്മമാരിൽ ഗുരുതരമായ വിളർച്ച, ഹീമോഗ്ലോബിന്റെ അളവ് 3 മുതൽ 8 വരെ താഴുന്ന അവസ്ഥ, മാസം തികയാതെയുള്ള പ്രസവം, കുഞ്ഞുങ്ങളിലെ അംഗവൈകല്യങ്ങൾ എന്നിവ വർധിക്കുന്നത് ആശങ്കാജനകമാണെന്നും അദ്ദേഹം ചൂണ്ടിക്കാട്ടി. അഗളി കമ്മ്യൂണിറ്റി ഹെൽത്ത് സെന്ററിന്റെ പ്രവർത്തനം കാര്യക്ഷമമാക്കണം. ഊരുകളിൽ നേരത്തെ പ്രവർത്തിച്ചിരുന്ന എൻ.എച്ച്.എം മൊബൈൽ യൂണിറ്റുകളും രക്തപരിശോധനയിലൂടെ രോഗനിർണയം നടത്തിയിരുന്ന ആരോഗ്യവകുപ്പിന്റെ മൊബൈൽ ലാബുകളും ഇപ്പോൾ നിർത്തലാക്കിയെന്നും അദ്ദേഹം ആരോപിച്ചു.

ആദിവാസി സ്ത്രീകളിൽ കണ്ടുവരുന്ന സിക്കിൾ സെൽ അനീമിയ ഉൾപ്പെടെയുള്ള ആരോഗ്യപ്രശ്നങ്ങൾക്ക് മതിയായ ചികിത്സ ഉറപ്പാക്കണം. ഇതിനായി പ്രവർത്തിച്ചിരുന്ന ആരോഗ്യ ഉദ്യോഗസ്ഥരെ കൂട്ടത്തോടെ സ്ഥലംമാറ്റിയതായും പിണറായി വിജയൻ പറഞ്ഞു. രോഗസർവേയുടെ വിവരങ്ങൾ സർക്കാർ പൂഴ്ത്തിവെക്കുകയാണെന്നും അദ്ദേഹം ആരോപിച്ചു.

ആംബുലൻസ് കമ്മിറ്റിയുടെ കരാർ പണമില്ലെന്ന കാരണം ചൂണ്ടിക്കാട്ടി പുതുക്കാൻ സർക്കാർ തയ്യാറായില്ലെന്നും ആശുപത്രിയിലെത്തുന്ന രോഗികൾക്ക് 150 രൂപയും കൂട്ടിരിപ്പുകാർക്ക് 200 രൂപയും നൽകുന്ന പദ്ധതി അട്ടിമറിക്കപ്പെടുന്ന സാഹചര്യമുണ്ടെന്നും അദ്ദേഹം പറഞ്ഞു. അട്ടപ്പാടിയിലെ ആരോഗ്യപ്രശ്നങ്ങളിൽ സർക്കാർ അടിയന്തരമായി ഇടപെടണമെന്നും പ്രതിപക്ഷ നേതാവ് ആവശ്യപ്പെട്ടു.