വോട്ട് കൊള്ള ആരോപണം: ഗ്യാനേഷ് കുമാറിനെതിരെ തെളിവുകളുമായി രാഷ്ട്രപതിയെ വീണ്ടും കാണാൻ ഇന്ത്യ സഖ്യം

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഉയർന്ന വോട്ട് കൊള്ള, തിരഞ്ഞെടുപ്പ് ക്രമക്കേട് ആരോപണങ്ങളിൽ വ്യക്തമായ തെളിവുകളുമായി രാഷ്ട്രപതി ദ്രൗപദി മുർമുവിനെ വീണ്ടും കാണാനൊരുങ്ങി പ്രതിപക്ഷ ഇന്ത്യ സഖ്യം. കൂടിക്കാഴ്ചയ്ക്കായി വരും ദിവസങ്ങളിൽ രാഷ്ട്രപതിയുടെ സമയം തേടാനാണ് നേതാക്കളുടെ തീരുമാനം. ഡൽഹി കേന്ദ്രീകരിച്ച് തുടരുന്ന പ്രതിഷേധം രാജ്യത്തെ വിവിധ സംസ്ഥാനങ്ങളിലേക്ക് വ്യാപിപ്പിക്കാനും പ്രതിപക്ഷം പദ്ധതിയിടുന്നുണ്ട്.

കഴിഞ്ഞ ഒക്ടോബർ 9-ന് രാഷ്ട്രപതിയുമായി നടത്തിയ കൂടിക്കാഴ്ചയിൽ തിരഞ്ഞെടുപ്പ് ക്രമക്കേടുകൾ സംബന്ധിച്ച ആരോപണങ്ങൾക്ക് തെളിവുകൾ ഹാജരാക്കാൻ രാഷ്ട്രപതി നിർദേശിച്ചിരുന്നു. ഇതിന്റെ അടിസ്ഥാനത്തിലാണ് കൂടുതൽ വിവരങ്ങളും രേഖകളും സഹിതം വീണ്ടും രാഷ്ട്രപതി ഭവനിലെത്താൻ ഇന്ത്യ സഖ്യം തീരുമാനിച്ചിരിക്കുന്നത്. തിരഞ്ഞെടുപ്പ് പ്രക്രിയയുടെ വിശ്വാസ്യത ചോദ്യം ചെയ്യപ്പെടുന്ന സാഹചര്യത്തിൽ വിഷയത്തിൽ രാഷ്ട്രപതിയുടെ ഇടപെടൽ ഉറപ്പാക്കുകയാണ് പ്രതിപക്ഷത്തിന്റെ ലക്ഷ്യം.

കഴിഞ്ഞ രണ്ട് വർഷത്തിനിടെ നടന്ന നിയമസഭാ തിരഞ്ഞെടുപ്പുകൾ റദ്ദാക്കണമെന്നതും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ സ്ഥാനത്തുനിന്ന് നീക്കണമെന്നതുമുൾപ്പെടെയുള്ള ആവശ്യങ്ങളാണ് പ്രതിപക്ഷം മുന്നോട്ടുവയ്ക്കുന്നത്. ആരോപണങ്ങൾ ജനങ്ങളിലേക്ക് എത്തിക്കുന്നതിനായി വിവിധ സംസ്ഥാനങ്ങളിൽ പ്രതിഷേധ പരിപാടികൾ ശക്തമാക്കാനും നേതാക്കൾ തീരുമാനിച്ചിട്ടുണ്ട്.

അതേസമയം, ഗ്യാനേഷ് കുമാറിനെതിരായ പ്രതിപക്ഷത്തിന്റെ ജനകീയ കുറ്റവിചാരണ ഇന്ന് (ഒക്ടോബർ 31) വൈകിട്ട് 3.30ന് കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ നടക്കും. മുൻ ലോക്‌സഭാ സ്പീക്കർ മീരാ കുമാർ അധ്യക്ഷത വഹിക്കുന്ന പരിപാടിയിൽ ലോക്‌സഭാ പ്രതിപക്ഷ നേതാവ് രാഹുൽ ഗാന്ധി ഉൾപ്പെടെയുള്ള മുതിർന്ന പ്രതിപക്ഷ നേതാക്കൾ പങ്കെടുക്കും. തിരഞ്ഞെടുപ്പ് കമ്മീഷന്റെ പ്രവർത്തനങ്ങളും ഗ്യാനേഷ് കുമാറിനെതിരായ ആരോപണങ്ങളും പരിപാടിയിൽ ചർച്ചയാകുമെന്നാണ് പ്രതീക്ഷിക്കുന്നത്.

തിരഞ്ഞെടുപ്പ് ക്രമക്കേടുകളുമായി ബന്ധപ്പെട്ട ആരോപണങ്ങളിൽ കേന്ദ്ര തിരഞ്ഞെടുപ്പ് കമ്മീഷനിൽനിന്ന് വിശദീകരണം തേടണമെന്നും ജനാധിപത്യ സംവിധാനത്തിന്റെ വിശ്വാസ്യത സംരക്ഷിക്കാൻ നടപടി വേണമെന്നുമാണ് ഇന്ത്യ സഖ്യത്തിന്റെ നിലപാട്. രാഷ്ട്രപതിയുമായുള്ള അടുത്ത കൂടിക്കാഴ്ചയിലൂടെ ഈ ആവശ്യങ്ങൾക്ക് കൂടുതൽ രാഷ്ട്രീയ പ്രാധാന്യം നൽകാനാണ് പ്രതിപക്ഷ നീക്കം.