എംഎസ്എഫ് അക്രമത്തിനെതിരെ പിണറായി വിജയൻ; കുറ്റക്കാരെ ഉടൻ അറസ്റ്റ് ചെയ്യണം

കാലിക്കറ്റ് സർവകലാശാലാ തെരഞ്ഞെടുപ്പിൽ എസ്എഫ്ഐയുടെ വിജയത്തിന് പിന്നാലെ പ്രവർത്തകരെ ആക്രമിച്ചെന്ന ആരോപണത്തിൽ എംഎസ്എഫിനും മുസ്ലിം ലീഗിനുമെതിരെ രൂക്ഷ വിമർശനവുമായി പിണറായി വിജയൻ. കായികമായ ആക്രമണങ്ങൾകൊണ്ട് എസ്എഫ്ഐയെ തകർക്കാമെന്നത് ലീഗിന്റെയും എംഎസ്എഫിന്റെയും വ്യാമോഹം മാത്രമാണെന്ന് അദ്ദേഹം ഫേസ്ബുക്ക് പോസ്റ്റിൽ കുറിച്ചു.

പരിക്കേറ്റ പ്രവർത്തകരെ സന്ദർശിക്കാനെത്തിയ എസ്എഫ്ഐ ജില്ലാ നേതാക്കളെ ആശുപത്രിയിൽ കയറി മാരകായുധങ്ങളുമായി ആക്രമിച്ചെന്നാണ് ആരോപണം. സംഭവത്തിന്റെ ദൃശ്യങ്ങൾ പുറത്തുവന്നിട്ടും അക്രമികളെ സംരക്ഷിക്കുന്ന പൊലീസ് നിലപാട് പ്രതിഷേധാർഹമാണെന്നും കുറ്റക്കാരെ ഉടൻ അറസ്റ്റ് ചെയ്യണമെന്നും പിണറായി വിജയൻ ആവശ്യപ്പെട്ടു.

എംഎസ്എഫിന്റെ അക്രമങ്ങൾക്കെതിരെ മുസ്ലിം ലീഗ് നേതൃത്വം നടപടി സ്വീകരിക്കണമെന്നും ശക്തമായ ജനകീയ പ്രതിരോധം ഉയരുമെന്നും അദ്ദേഹം വ്യക്തമാക്കി.