ബോർഡ് കോർപറേഷൻ നിയമനത്തിൽ യുഡിഎഫിൽ കലഹം രൂക്ഷം; അതൃപ്തി പരിഹരിക്കാൻ മുഖ്യമന്ത്രിയും കെപിസിസി അധ്യക്ഷനും ചർച്ച നടത്തും
ബോർഡ്–കോർപറേഷൻ സ്ഥാനങ്ങൾ വീതംവയ്ക്കുന്നതുമായി ബന്ധപ്പെട്ട തർക്കം കോൺഗ്രസിലും യുഡിഎഫിലും രൂക്ഷമാകുന്നു. നിയമനത്തിലെ അസംതൃപ്തി കോൺഗ്രസ് നേതൃത്വത്തെയും സർക്കാരിനെയും ഒരുപോലെ പ്രതിസന്ധിയിലാക്കിയിരിക്കുകയാണ്. ഘടകകക്ഷികൾ ഉൾപ്പെടെ പരസ്യമായി അതൃപ്തി പ്രകടിപ്പിച്ചതോടെ പ്രശ്നപരിഹാരത്തിനുള്ള നീക്കങ്ങൾ നേതൃത്വം ആരംഭിച്ചു.
ഇതിന്റെ ഭാഗമായി മുഖ്യമന്ത്രി വി.ഡി. സതീശനും കെപിസിസി അധ്യക്ഷൻ സണ്ണി ജോസഫും ഇന്ന് കൂടിക്കാഴ്ച നടത്തും. തുടർന്ന് ഘടകകക്ഷികളുമായും ചർച്ച നടത്താനാണ് തീരുമാനം. കേരള കോൺഗ്രസ് ജോസഫ് വിഭാഗം, ആർഎസ്പി എന്നീ പാർട്ടികളുമായി നേതൃത്വം ആശയവിനിമയം നടത്തും.
ബോർഡ്–കോർപറേഷൻ സ്ഥാനങ്ങൾ സംബന്ധിച്ച തർക്കം നേരത്തെ തന്നെ യുഡിഎഫിൽ അസ്വാരസ്യങ്ങൾക്ക് വഴിവെച്ചിരുന്നു. കോൺഗ്രസിലെ തീരുമാനങ്ങൾ വൈകുന്നതിനിടെ മുസ്ലിം ലീഗ് സ്വന്തം നിലയിൽ ചെയർമാൻ സ്ഥാനങ്ങളിലേക്കുള്ള പട്ടിക തയ്യാറാക്കിയതും വിവാദമായി. കൂടുതൽ സ്ഥാനങ്ങൾ വേണമെന്ന ആവശ്യവുമായി ലീഗ് മുന്നോട്ടുപോകുന്നതും മുന്നണിയിൽ അതൃപ്തി വർധിപ്പിച്ചിട്ടുണ്ട്.
മുസ്ലിം ലീഗിന് കൂടുതൽ പരിഗണന നൽകുന്നുവെന്ന വികാരം കോൺഗ്രസിലെ ഒരു വിഭാഗത്തിനിടയിൽ ശക്തമാണ്. കോൺഗ്രസിനുള്ളിലെ അഭിപ്രായവ്യത്യാസങ്ങൾക്കൊപ്പം ഘടകകക്ഷികളുടെ സമ്മർദവും വർധിച്ചതോടെ സ്ഥാനവിഭജനത്തിലെ പ്രതിസന്ധി യുഡിഎഫ് നേതൃത്വത്തിന് തലവേദനയായിരിക്കുകയാണ്.