കേരള ബാങ്ക് പിരിച്ചുവിടാനുള്ള നീക്കം സഹകരണ മേഖലയെ തകർക്കും: എം.വി. ജയരാജൻ
കേരള ബാങ്ക് പിരിച്ചുവിടാനുള്ള നീക്കം പ്രതിഷേധാർഹമാണെന്ന് സിപിഐഎം നേതാവ് എം.വി. ജയരാജൻ. കൃത്യമായ പഠനത്തിനും റിസർവ് ബാങ്കിന്റെ അനുമതിക്കും ശേഷമാണ് കേരള ബാങ്ക് രൂപീകരിച്ചതെന്നും സഹകരണ മേഖലയെ ശക്തിപ്പെടുത്തുക എന്ന ലക്ഷ്യത്തോടെയാണ് ബാങ്ക് പ്രവർത്തനം ആരംഭിച്ചതെന്നും അദ്ദേഹം പറഞ്ഞു. വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.
കേരള ബാങ്ക് പിരിച്ചുവിട്ട് ത്രിതല സഹകരണ സംവിധാനം നടപ്പാക്കുമെന്ന സഹകരണ മന്ത്രിയുടെ പ്രസ്താവന സഹകരണ പ്രസ്ഥാനത്തെ തകർക്കുന്നതാണെന്ന് ജയരാജൻ ആരോപിച്ചു. സഹകരണ മേഖലയെ ദുർബലപ്പെടുത്തുന്ന നയങ്ങളാണ് യുഡിഎഫ് സർക്കാർ സ്വീകരിക്കുന്നതെന്നും അമിത് ഷാ ജില്ലാ സഹകരണ ബാങ്കുകൾ ആരംഭിക്കുമെന്ന് പറയുന്ന സാഹചര്യത്തിൽ കേരള ബാങ്ക് പിരിച്ചുവിടാനുള്ള നീക്കം സംശയാസ്പദമാണെന്നും അദ്ദേഹം പറഞ്ഞു.
കേരള ബാങ്ക് പിരിച്ചുവിടാനുള്ള തീരുമാനം യുഡിഎഫ്-ബിജെപി ധാരണയുടെ ഭാഗമാണോയെന്ന് മുഖ്യമന്ത്രി വ്യക്തമാക്കണമെന്നും ജയരാജൻ ആവശ്യപ്പെട്ടു. ആവശ്യമായ പഠനങ്ങളില്ലാതെ ബാങ്ക് പിരിച്ചുവിടുമെന്ന് പ്രഖ്യാപിക്കുന്നത് സഹകാരികളോടുള്ള വെല്ലുവിളിയാണെന്നും അദ്ദേഹം കൂട്ടിച്ചേർത്തു.
പ്രാഥമിക സഹകരണ സംഘങ്ങൾക്ക് കേരള ബാങ്ക് സാമ്പത്തികവും സാങ്കേതികവുമായ സഹായങ്ങൾ നൽകുന്നുണ്ടെന്ന് ജയരാജൻ ചൂണ്ടിക്കാട്ടി. പ്രതിസന്ധിയിലായ ബാങ്കുകളെ സഹായിക്കാൻ പുനരുദ്ധാരണ പദ്ധതികളും നടപ്പാക്കുന്നുണ്ട്. ജില്ലാ സഹകരണ ബാങ്കുകൾ കേരള ബാങ്കിൽ ലയിച്ചതോടെ ഭരണച്ചെലവ് ഗണ്യമായി കുറഞ്ഞതായും അദ്ദേഹം പറഞ്ഞു.
കേരള ബാങ്ക് പിരിച്ചുവിടുന്നത് സഹകരണ മേഖലയുടെ തകർച്ചയ്ക്ക് വഴിയൊരുക്കുമെന്നും നിയമവിരുദ്ധമാണെന്നും ജയരാജൻ ആരോപിച്ചു. കേരള നിയമസഭ പാസാക്കിയ നിയമത്തിന്റെ അടിസ്ഥാനത്തിലും റിസർവ് ബാങ്കിന്റെ അനുമതിയോടെയുമാണ് ബാങ്ക് പ്രവർത്തിക്കുന്നതെന്നും അദ്ദേഹം വ്യക്തമാക്കി.