Skip to main content
വാർത്തകൾ

കേന്ദ്രത്തിന്റെ കർഷകവിരുദ്ധ നയങ്ങൾക്കെതിരെ രാജ്യവ്യാപക പോരാട്ടം ശക്തമാക്കണം: ബൃന്ദ കാരാട്ട്

brinda

നരേന്ദ്ര മോദി സർക്കാരിന്റെ കർഷകവിരുദ്ധ നയങ്ങൾക്കെതിരെ രാജ്യത്തെ കർഷകരും കർഷകത്തൊഴിലാളികളും ഐക്യപോരാട്ടം ശക്തമാക്കണമെന്ന് സിപിഐഎം നേതാവും മുൻ രാജ്യസഭാംഗവുമായ ബൃന്ദ കാരാട്ട്. കർഷകരുടെ താൽപര്യങ്ങൾ കോർപറേറ്റുകൾക്ക് അടിയറവയ്ക്കുന്ന നയങ്ങൾ തിരുത്തണമെന്നും കർഷക പ്രസ്ഥാനത്തിന്റെ ശക്തിയിലൂടെ കേന്ദ്ര സർക്കാരിനെ ഉത്തരവാദിത്തം ഏറ്റെടുപ്പിക്കണമെന്നും അവർ ആവശ്യപ്പെട്ടു. ഞായറാഴ്ച നൽഗൊണ്ട എൻജി കോളേജ് മൈതാനത്ത് നടന്ന അഖിലേന്ത്യ കിസാൻ സഭയുടെ (എഐകെഎസ്) 36-ാം ദേശീയ സമ്മേളനത്തിൽ സംസാരിക്കുകയായിരുന്നു അവർ.

നൽഗൊണ്ടയുടെ മണ്ണിൽ നടക്കുന്ന കിസാൻ സഭാ സമ്മേളനങ്ങൾക്ക് ചരിത്രപരമായ പ്രാധാന്യമുണ്ടെന്ന് ബൃന്ദ കാരാട്ട് പറഞ്ഞു. കർഷകർ, കർഷകത്തൊഴിലാളികൾ, ഗ്രാമീണ ദരിദ്രർ എന്നിവരുടെ അവകാശങ്ങൾക്കായി ഒൻപത് പതിറ്റാണ്ടായി കിസാൻ സഭ പോരാടുകയാണ്. തെലങ്കാനയിലെ കർഷക സായുധ സമരത്തിൽ ചെങ്കൊടി വഹിച്ച പങ്ക് അവർ അനുസ്മരിച്ചു. നൽഗൊണ്ടയിലെ ആയിരക്കണക്കിന് ഗ്രാമങ്ങളിൽ ജന്മിമാരുടെ ചൂഷണത്തിനും നിർബന്ധിത തൊഴിലിനുമെതിരെ നടന്ന പോരാട്ടം കർഷക പ്രസ്ഥാനത്തിന്റെ ചരിത്രത്തിൽ സവിശേഷ സ്ഥാനമുള്ളതാണെന്നും ദൊడ్డి കൊമുരയ്യ, ചാകലി ഐലമ്മ, പുച്ചലപ്പള്ളി സുന്ദരയ്യ, മല്ലു സ്വരാജ്യം തുടങ്ങിയ നേതാക്കളുടെയും രക്തസാക്ഷികളുടെയും ത്യാഗങ്ങൾ മറക്കാനാവില്ലെന്നും അവർ പറഞ്ഞു.

തെലങ്കാനയിലെ കർഷക സമരത്തെ മതത്തിന്റെ കണ്ണിലൂടെ ചിത്രീകരിക്കാൻ ബിജെപിയും ആർഎസ്എസും ശ്രമിക്കരുതെന്ന് ബൃന്ദ കാരാട്ട് മുന്നറിയിപ്പ് നൽകി. ഹിന്ദുക്കളും മുസ്ലിങ്ങളും തമ്മിലുള്ള പോരാട്ടമായിരുന്നില്ല അത്. ജന്മിമാരുടെ ചൂഷണത്തിനെതിരെ കർഷകർ നടത്തിയ വർഗസമരമായിരുന്നു. മോദി സർക്കാർ ഭരണഘടന, മതനിരപേക്ഷത, സാമൂഹികനീതി, സമത്വമൂല്യങ്ങൾ എന്നിവ ദുർബലപ്പെടുത്തുകയാണെന്നും രാജ്യത്തെ കാർഷിക മേഖലയെ ആഭ്യന്തര-വിദേശ കോർപറേറ്റുകളുടെയും കാർഷിക വ്യവസായ കമ്പനികളുടെയും നിയന്ത്രണത്തിലാക്കാനാണ് കേന്ദ്രത്തിന്റെ ശ്രമമെന്നും അവർ ആരോപിച്ചു.

മൂന്ന് കാർഷിക നിയമങ്ങൾക്കെതിരെ രാജ്യത്ത് നടന്ന ചരിത്രപരമായ കർഷക പ്രക്ഷോഭം കേന്ദ്ര സർക്കാരിനെ പിന്നോട്ടടിപ്പിച്ച കാര്യം അവർ ഓർമിപ്പിച്ചു. ഇന്ത്യ-അമേരിക്ക വ്യാപാര കരാറിൽ കർഷകരുമായി കേന്ദ്രം കൂടിയാലോചന നടത്തിയിട്ടുണ്ടോയെന്നും അവർ ചോദിച്ചു. രാജ്യത്തെ കർഷകരുടെ താൽപര്യങ്ങൾക്ക് ഗുരുതരമായ ദോഷം വരുത്താൻ സാധ്യതയുള്ള ഇത്തരം കരാറുകൾ നിർത്തിവയ്ക്കണമെന്നും ആവശ്യപ്പെട്ടു.

അവശ്യസാധനങ്ങളുടെ വിലക്കയറ്റം സാധാരണക്കാരെയും കർഷക കുടുംബങ്ങളെയും വലിയ പ്രതിസന്ധിയിലാക്കുകയാണെന്ന് ബൃന്ദ കാരാട്ട് പറഞ്ഞു. യുദ്ധങ്ങളെ മറയാക്കി ഉത്തരവാദിത്തത്തിൽനിന്ന് സർക്കാർ ഒഴിഞ്ഞുമാറുമ്പോഴും അരി, പയർവർഗങ്ങൾ, എണ്ണ, പച്ചക്കറികൾ എന്നിവയുടെ വില ഉയരുകയാണ്. ജനങ്ങൾക്ക് ആശ്വാസമാകാൻ അവശ്യസാധനങ്ങൾ റേഷൻ സംവിധാനത്തിലൂടെ സബ്സിഡി നിരക്കിൽ ലഭ്യമാക്കണമെന്നും അവർ ആവശ്യപ്പെട്ടു.

സ്വാമിനാഥൻ കമ്മിഷൻ ശുപാർശകൾക്കനുസരിച്ച് കർഷകരുടെ ഉൽപ്പന്നങ്ങൾക്ക് മിനിമം താങ്ങുവില ഉറപ്പാക്കണം. ഡീസൽ വില നിയന്ത്രിക്കുക, വൈദ്യുതി മേഖലയുടെ സ്വകാര്യവൽക്കരണം അവസാനിപ്പിക്കുക, സ്മാർട്ട് മീറ്ററിന്റെ പേരിൽ കർഷകർക്ക് അധിക ബാധ്യത വരുത്തുന്നത് തടയുക തുടങ്ങിയ ആവശ്യങ്ങളും അവർ ഉന്നയിച്ചു. ന്യായമായ താങ്ങുവിലയും കുറഞ്ഞ നിരക്കിലുള്ള വൈദ്യുതിയും ലഭിച്ചാൽ കർഷകർക്ക് സ്വയംപര്യാപ്തരാകാൻ കഴിയുമെന്ന് അവർ പറഞ്ഞു. വരുമാനം വർധിപ്പിക്കുന്ന നയങ്ങൾ നടപ്പാക്കാതെ പ്രതിമാസം 6,000 രൂപയുടെ സഹായം നൽകുന്നതുകൊണ്ട് കാർഷിക പ്രതിസന്ധിക്ക് പരിഹാരമാകില്ലെന്നും കൂട്ടിച്ചേർത്തു.

രാജ്യത്തെ കാർഷിക പ്രതിസന്ധിയുടെ തീവ്രത വ്യക്തമാക്കുന്നതാണ് കർഷക ആത്മഹത്യകളെന്ന് ബൃന്ദ കാരാട്ട് ചൂണ്ടിക്കാട്ടി. ദേശീയ ക്രൈം റെക്കോർഡ്സ് ബ്യൂറോയുടെ കണക്കുകൾ പ്രകാരം കഴിഞ്ഞ 12 വർഷത്തിനിടെ കാർഷിക മേഖലയുമായി ബന്ധപ്പെട്ട് ഏകദേശം 1.5 ലക്ഷം ആത്മഹത്യകൾ റിപ്പോർട്ട് ചെയ്തിട്ടുണ്ട്. കടബാധ്യത, കൃഷിച്ചെലവിലെ വർധന, ഉൽപ്പന്നങ്ങൾക്ക് ന്യായമായ വില ലഭിക്കാത്തത് എന്നിവയാണ് കർഷകരെ പ്രതിസന്ധിയിലാക്കുന്നത്. വരൾച്ചയും വെള്ളപ്പൊക്കവും മൂലം കൃഷിനാശമുണ്ടാകുമ്പോഴും മതിയായ നഷ്ടപരിഹാരം ലഭിക്കുന്നില്ല. തെലങ്കാനയിലെ 36 മണ്ഡലങ്ങളെ വരൾച്ചാബാധിത പ്രദേശങ്ങളായി പ്രഖ്യാപിച്ച സാഹചര്യത്തിൽ സമഗ്ര നഷ്ടപരിഹാരം നൽകണമെന്നും വിള ഇൻഷുറൻസ് പദ്ധതികളിൽ കർഷകരേക്കാൾ കൂടുതൽ നേട്ടമുണ്ടാക്കുന്നത് ഇൻഷുറൻസ് കമ്പനികളാണെന്നും അവർ വിമർശിച്ചു.

ഗ്രാമീണ ദരിദ്രർ, ഭൂരഹിത കർഷകത്തൊഴിലാളികൾ, ചെറുകിട കർഷകർ എന്നിവരുടെ പ്രധാന ഉപജീവനമാർഗമാണ് തൊഴിലുറപ്പ് പദ്ധതിയെന്ന് അവർ പറഞ്ഞു. പദ്ധതി ശക്തിപ്പെടുത്തുകയും 100 ദിവസത്തെ തൊഴിൽ ഉറപ്പ് ഫലപ്രദമായി നടപ്പാക്കുകയും വേണം. ഭൂമിയിലെ അസമത്വം വർധിക്കുകയും ചെറുകിട കർഷകർ കടബാധ്യതയിൽ അകപ്പെടുകയും ചെയ്യുന്ന സാഹചര്യത്തിൽ ഭൂപരിധി നിയമങ്ങൾ നടപ്പാക്കണം. ഭൂരഹിതർക്ക് ഭൂമി വിതരണം ചെയ്യുന്നതിനൊപ്പം ഭൂപരിഷ്കരണ നടപടികളും മുന്നോട്ടുകൊണ്ടുപോകണമെന്നും അവർ ആവശ്യപ്പെട്ടു.

കാർഷിക മേഖലയിൽ പകുതിയിലധികം ജോലികൾ നിർവഹിക്കുന്നത് സ്ത്രീകളാണെങ്കിലും അവരെ കർഷകരായി അംഗീകരിക്കുന്നില്ലെന്ന് ബൃന്ദ കാരാട്ട് പറഞ്ഞു. ഭൂമിയുടെ ഉടമസ്ഥാവകാശം, സർക്കാർ പദ്ധതികൾ, കാർഷിക വായ്പകൾ, മറ്റ് ആനുകൂല്യങ്ങൾ എന്നിവയിൽ സ്ത്രീകൾക്ക് തുല്യാവകാശം ഉറപ്പാക്കണം. സ്ത്രീകളെ വെറും കുടുംബസഹായികളായി മാത്രം കാണുന്ന രീതി അവസാനിപ്പിച്ച് കാർഷിക മേഖലയിലെ അവരുടെ യഥാർഥ പങ്കിനനുസരിച്ച് കർഷകരായി ഔദ്യോഗിക അംഗീകാരം നൽകണമെന്നും അവർ ആവശ്യപ്പെട്ടു.

വികസന പദ്ധതികളുടെ പേരിൽ ആദിവാസി സമൂഹങ്ങളെ കൃഷിഭൂമികളിൽനിന്നും വനഭൂമികളിൽനിന്നും കുടിയൊഴിപ്പിക്കുന്നത് അവസാനിപ്പിക്കണമെന്നും ബൃന്ദ കാരാട്ട് ആവശ്യപ്പെട്ടു. വനാവകാശ നിയമം ഫലപ്രദമായി നടപ്പാക്കി ആദിവാസികളുടെ ഭൂമിയിലെ നിയമപരമായ അവകാശങ്ങൾ അംഗീകരിക്കണം. ഭരണഘടനയും ജനാധിപത്യവും സംരക്ഷിക്കുമെന്ന് അവകാശപ്പെടുന്ന തെലങ്കാനയിലെ കോൺഗ്രസ് സർക്കാരിനും വനാവകാശ നിയമം നടപ്പാക്കുന്നതിൽ ഉത്തരവാദിത്തമുണ്ട്. ആദിവാസികളെ കൈയേറ്റക്കാരായി ചിത്രീകരിക്കുന്നതും ബലപ്രയോഗത്തിലൂടെയുള്ള കുടിയൊഴിപ്പിക്കലും അവസാനിപ്പിക്കണമെന്നും അവർ പറഞ്ഞു.

കർഷകർ, കർഷകത്തൊഴിലാളികൾ, ഗ്രാമീണ ദരിദ്രർ എന്നിവർ നേരിടുന്ന പ്രശ്നങ്ങളിൽ രാജ്യത്തുടനീളം നടക്കുന്ന പോരാട്ടങ്ങൾക്ക് കിസാൻ സഭ പിന്തുണ നൽകുമെന്ന് ബൃന്ദ കാരാട്ട് വ്യക്തമാക്കി. അടിച്ചമർത്തൽ എവിടെയുണ്ടോ അവിടെ പ്രതിരോധവുമുണ്ടാകുമെന്ന് ഓർമിപ്പിച്ച അവർ കർഷകവിരുദ്ധവും കോർപറേറ്റ് അനുകൂലവുമായ നയങ്ങൾക്കെതിരെ ഐക്യസമരങ്ങൾ കൂടുതൽ ശക്തിപ്പെടുത്തണമെന്നും ആഹ്വാനം ചെയ്തു.