ബിജെപിക്കായി വോട്ട് മോഷ്ടിക്കുന്നു; ഗ്യാനേഷ് കുമാർ രാജിവയ്ക്കണം: തോമസ് ഐസക്

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവയ്ക്കണമെന്ന് സിപിഐഎം കേന്ദ്ര കമ്മിറ്റി അംഗവും  മുൻ ധനമന്ത്രിയുമായ ടി.എം. തോമസ് ഐസക്. ഗ്യാനേഷ് കുമാർ ബിജെപിക്ക് വേണ്ടി വോട്ടുകൾ മോഷ്ടിക്കുകയാണെന്ന് ആരോപിച്ച ഐസക്, അദ്ദേഹത്തിനെതിരായ പ്രതിഷേധത്തിൽ നിന്ന് പ്രതിപക്ഷം പിന്നോട്ടുപോകില്ലെന്നും വ്യക്തമാക്കി.

“മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന് തുടരാൻ ഒരു വഴിയുമില്ല. അദ്ദേഹം പോകണം. അദ്ദേഹം ബിജെപിക്ക് വേണ്ടി വോട്ടുകൾ മോഷ്ടിച്ചുകൊണ്ടിരിക്കുകയാണ്. അതിനാൽ ഈ ആവശ്യത്തിൽ നിന്ന് പിന്നോട്ടുപോകില്ല,” തോമസ് ഐസക് പറഞ്ഞു.

വോട്ടർ പട്ടിക പരിഷ്കരണവും പ്രത്യേക തീവ്ര പരിഷ്കരണമായ എസ്‌ഐആറും (SIR) സംബന്ധിച്ച പ്രതിപക്ഷ പ്രതിഷേധങ്ങൾക്കിടെയായിരുന്നു അദ്ദേഹത്തിന്റെ പ്രതികരണം. ഡൽഹിയിൽ ഇന്ത്യാ ബ്ലോക്ക് എംപിമാർ തിരഞ്ഞെടുപ്പ് കമ്മീഷൻ ആസ്ഥാനമായ നിർവചൻ സദനിലേക്ക് നടത്തിയ മാർച്ചിനിടെയാണ് തോമസ് ഐസക് നിലപാട് വ്യക്തമാക്കിയത്.

പ്രതിഷേധം രാഷ്ട്രീയ പാർട്ടികളുടെ പരിധി വിട്ട് വ്യാപിക്കുകയാണെന്നും ഐസക് ചൂണ്ടിക്കാട്ടി. എംപിമാർക്ക് പുറമെ യുവാക്കളും വിദ്യാർഥി സംഘടനകളും തിരഞ്ഞെടുപ്പ് കമ്മീഷനെതിരെ രംഗത്തെത്തിയതായി അദ്ദേഹം പറഞ്ഞു.

“ഇന്ന് പാർലമെന്റ് അംഗങ്ങൾ മാർച്ച് നടത്തി. യുവാക്കളും വിദ്യാർഥികളും മാർച്ചിലാണ്. പ്രതിപക്ഷ പാർട്ടികൾ തെരുവിലിറങ്ങിയിട്ടുണ്ട്,” ഐസക് പറഞ്ഞു.

രാഷ്ട്രീയ സംഘർഷം കൂടുതൽ രൂക്ഷമാകുന്നതിന് മുമ്പ് കേന്ദ്ര സർക്കാർ ഇടപെടണമെന്നും അദ്ദേഹം ആവശ്യപ്പെട്ടു. “ഇത് വലിയൊരു ഏറ്റുമുട്ടലിലേക്ക് വഷളാകുന്നതിന് മുമ്പ് ഡൽഹിയിലെ ആസ്ഥാനത്ത് കുറച്ച് വിവേകം നിലനിൽക്കണം,” അദ്ദേഹം കൂട്ടിച്ചേർത്തു.

അതേസമയം, ഇന്ത്യാ ബ്ലോക്ക് നേതാക്കളുടെ നിർവചൻ സദൻ മാർച്ച് പൊലീസ് തടഞ്ഞതിനെ തുടർന്ന് കോൺഗ്രസ് നേതാക്കൾ ആകാശവാണി ഭവന് മുന്നിൽ കുത്തിയിരിപ്പ് സമരം നടത്തി. തിരഞ്ഞെടുപ്പ് കമ്മീഷനെതിരായ പ്രതിപക്ഷത്തിന്റെ വിശാലമായ ‘സേവ് ഡെമോക്രസി’ പ്രചാരണത്തിന്റെ ഭാഗമായാണ് പ്രതിഷേധം.

എസ്‌ഐആർ പരിശോധനയ്ക്കിടെ രണ്ട് തിരഞ്ഞെടുപ്പ് കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും 14 എതിർപ്പുകൾ ഉന്നയിച്ചെന്ന റിപ്പോർട്ടിനെ തുടർന്നും വിവാദം ശക്തമായിരുന്നു. എന്നാൽ എല്ലാ തീരുമാനങ്ങളും ഏകകണ്ഠമായിരുന്നുവെന്നാണ് തിരഞ്ഞെടുപ്പ് കമ്മീഷന്റെ നിലപാട്.

എസ്‌ഐആർ നടപടിയുടെ ഭാഗമായി പുതിയ വോട്ടർമാരെ പട്ടികയിൽ ഉൾപ്പെടുത്താൻ ഉപയോഗിക്കുന്ന ഫോം 6ൽ മാറ്റങ്ങൾ വരുത്തിയെന്ന പ്രതിപക്ഷ ആരോപണവും ശക്തമാണ്. അതേസമയം, ഫോം 6ൽ മാറ്റങ്ങളൊന്നും വരുത്തിയിട്ടില്ലെന്ന് സുപ്രീം കോടതി തിങ്കളാഴ്ച വ്യക്തമാക്കിയിരുന്നു.