അതിജീവനത്തിന്റെ പ്രതീകമായി വയനാട്ടിൽ നിന്നെത്തിയ വെള്ളാർമല സ്‌കൂളിലെ വിദ്യാർഥികൾക്ക് പ്രതീക്ഷ പകർന്ന് മുഖ്യമന്ത്രിയുടെ വാക്കുകൾ.മുണ്ടക്കൈ - ചൂരൽമല ദുരന്തത്തിൽ തകർന്നുപോയ വെള്ളാർമല സ്‌കൂൾ അവിടെ തന്നെ പുനർനിർമിക്കുമെന്ന ഉറപ്പാണ് മുഖ്യമന്ത്രി കുട്ടികൾക്ക് നൽകിയത്.
''നിങ്ങടെ സ്‌കൂൾ അവിടെത്തന്നെ ഉണ്ടാകും'' എന്ന് മുഖ്യമന്ത്രി പറഞ്ഞപ്പോൾ കുഞ്ഞുമനസ്സുകളിൽ ആഹ്ലാദത്തിരയിളക്കം. 'ഞങ്ങളുടെ സ്‌കൂൾ ഞങ്ങളുടെ സ്ഥലത്ത് തന്നെ വേണം' എന്ന് കുട്ടികൾ ആവശ്യപ്പെട്ടപ്പോഴാണ് മുഖ്യമന്ത്രി ഈ ഉറപ്പ് നൽകിയത്.
63-ാമത് കേരള സ്‌കൂൾ കലോത്സവത്തിന്റെ ഉദ്ഘാടനം നിർവഹിച്ച ശേഷം, വെള്ളാർമല ജി വി എച്ച് സ്‌കൂളിലെ വിദ്യാർത്ഥിനികളെ കാണാനെത്തിയതായിരുന്നു മുഖ്യമന്ത്രി. വിദ്യാർഥികളുടെ അതിജീവനനൃത്തം ഉദ്ഘാടന സമ്മേളനത്തിന്റെ മാറ്റ് കൂട്ടി.
