വഖഫ് നിയമത്തിനെതിരായ പ്രതിഷേധങ്ങളില്‍ നിന്നുള്ള അക്രമങ്ങള്‍ മുര്‍ഷിദാബാദിന് അപ്പുറം പശ്ചിമ ബംഗാളിന്റെ മറ്റ് പ്രദേശങ്ങളിലേക്കും വ്യാപിച്ചതോടെ പ്രതികരണവുമായി മുഖ്യമന്ത്രി മമത ബാനര്‍ജി. സംസഥാനത്ത് ശാന്തിക്കും സമാധാനത്തിനും വേണ്ടി മുഖ്യമന്ത്രി വീണ്ടും ആഹ്വാനം ചെയ്തു.
മതത്തിന്റെ പേരില്‍ മതവിരുദ്ധ കളികള്‍ നടത്തരുതെന്നും പ്രതിഷേധിക്കാനുള്ള അവകാശം ഉയര്‍ത്തിപ്പിടിക്കുന്നതിനൊപ്പം നിയമം കൈയിലെടുക്കരുതെന്നും അവര്‍ പൊതുജനങ്ങളോട് അഭ്യര്‍ത്ഥിച്ചു. മതവുമായി ബന്ധപ്പെട്ട് മതവിരുദ്ധമായ കളികള്‍ കളിക്കരുത്. ധര്‍മ്മം എന്നാല്‍ ഭക്തി, വാത്സല്യം, മനുഷ്യത്വം, സമാധാനം, സൗഹൃദം, സംസ്‌കാരം, ഐക്യം, ഐക്യം എന്നിവയാണ്. മനുഷ്യരെ സ്‌നേഹിക്കുക എന്നത് ഏതൊരു മതത്തിന്റെയും ഏറ്റവും ഉയര്‍ന്ന പ്രകടനങ്ങളിലൊന്നാണ്. നമ്മള്‍ ഒറ്റയ്ക്ക് ജനിക്കുന്നു, ഒറ്റയ്ക്ക് മരിക്കുന്നു. പിന്നെ എന്തിനാണ് യുദ്ധം ചെയ്യുന്നത്? എന്തിനാണ് കലാപങ്ങള്‍?' മമതാ ബാനര്‍ജി ചോദിച്ചു.
ആക്രമിക്കപ്പെടുന്നവരോ അടിച്ചമര്‍ത്തപ്പെടുന്നവരോ ആയവരുടെ പശ്ചാത്തലമോ മതമോ പരിഗണിക്കാതെ അവര്‍ക്കൊപ്പം നില്‍ക്കണമെന്നും മമത ആഹ്വാനം ചെയ്തു. അനുവാദത്തോടെ സമാധാനപരമായ പ്രതിഷേധങ്ങള്‍ നടത്താന്‍ എല്ലാവര്‍ക്കും അവകാശമുണ്ട്. എന്നാല്‍ നിയമം കൈയിലെടുക്കരുത് എന്ന് എല്ലാവരോടും അഭ്യര്‍ത്ഥിക്കുന്നു. നമുക്ക് നിയമത്തിന്റെ സൂക്ഷിപ്പുകാരുണ്ട്. നിയമത്തിന് പുറത്ത് പ്രവര്‍ത്തിക്കുന്നവരെ നമുക്ക് ആവശ്യമില്ല. അതുകൊണ്ടാണ് ആരെങ്കിലും നിങ്ങളെ പ്രേരിപ്പിക്കാന്‍ ശ്രമിക്കുമ്പോള്‍, കെണിയില്‍ വീഴരുതെന്ന് അഭ്യര്‍ത്ഥിക്കുന്നതെന്നും അവര്‍ കൂട്ടിച്ചേര്‍ത്തു.
