കെ സുധാകരനും കോൺഗ്രസ് നേതൃത്വവും തമ്മിലുള്ള അസ്വാരസ്യങ്ങൾ ഇപ്പോൾ പരസ്യമായി പുറത്തുവരുന്ന സാഹചര്യമാണ്. ലോക്സഭയിൽ സ്പീക്കർക്കെതിരായ അവിശ്വാസ പ്രമേയവുമായി ബന്ധപ്പെട്ട് പാർട്ടി നൽകിയ മൂന്ന് ദിവസത്തെ വിപ്പ് ലംഘിച്ച് കെ സുധാകരൻ സമ്മേളനത്തിൽ നിന്ന് വിട്ടുനിന്നു. അതേസമയം ലോക്സഭാ സമ്മേളനത്തിൽ പങ്കെടുക്കുന്നതിന് പകരം കണ്ണൂരിൽ നടത്തിയ പരിപാടിയിൽ അദ്ദേഹം തന്റെ സ്ഥാനാർത്ഥിത്വം സ്വയം പ്രഖ്യാപിക്കുകയും ചെയ്തു.
ദില്ലിയിൽ തെരഞ്ഞെടുപ്പ് സമിതി യോഗം ചേരാനിരിക്കെയാണ് ഹൈക്കമാൻഡിനോടുള്ള അതൃപ്തി സുധാകരൻ ഇങ്ങനെ തുറന്നുപറഞ്ഞത്. സിറ്റിംഗ് എംപിമാർ വീണ്ടും മത്സരിക്കുമോ എന്ന കാര്യത്തിൽ പാർട്ടി നേതൃത്വം ഇതുവരെ അന്തിമ തീരുമാനം എടുത്തിട്ടില്ല. എന്നാൽ ആ തീരുമാനം കാത്തിരിക്കാതെയാണ് സുധാകരൻ മുന്നോടിയായി തന്റെ നിലപാട് വ്യക്തമാക്കിയിരിക്കുന്നത്.
ലോക്സഭാ സമ്മേളനത്തിൽ നിന്ന് വിട്ടുനിന്നതിനെക്കുറിച്ച് ഇതുവരെ അദ്ദേഹം വിശദീകരണം നൽകിയിട്ടില്ല എന്നതും ശ്രദ്ധേയമാണ്.
