ചോദ്യപേപ്പർ ചോർച്ചയ്ക്കെതിരെ ഡൽഹി ജന്തർ മന്തറിലും രാജ്യത്തിന്റെ വിവിധ ഭാഗങ്ങളിലുമായി നടന്ന വിദ്യാർത്ഥി പ്രതിഷേധങ്ങളുമായി ബന്ധപ്പെട്ട കേസിൽ സുപ്രീം കോടതിയുടെ സുപ്രധാന നിരീക്ഷണം. പ്രതിഷേധിക്കുന്ന യുവജനങ്ങളുടെ ആശങ്കകൾ മനസ്സിലാക്കി പ്രശ്നപരിഹാരത്തിന് ശ്രമിക്കുകയാണ് അധികാരികൾ ചെയ്യേണ്ടതെന്നും, സാഹചര്യം അക്രമത്തിലേക്ക് വഴിമാറാതിരിക്കാൻ സംയമനത്തോടെ ഇടപെടണമെന്നും കോടതി വ്യക്തമാക്കി.
ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ചാണ് കേസ് പരിഗണിച്ചത്. ജൂലൈ 20-ന് നടന്ന പ്രതിഷേധങ്ങൾക്ക് ആഹ്വാനം ചെയ്ത കോക്രോച്ച് ജനതാ പാർട്ടി (സി.ജെ.പി)ക്കെതിരെ നടപടി ആവശ്യപ്പെട്ട് വിരമിച്ച വ്യോമസേന ഉദ്യോഗസ്ഥർ നൽകിയ ഹർജിയിലായിരുന്നു കോടതിയുടെ പരാമർശം.
സമരക്കാരായ യുവാക്കളെ കൈകാര്യം ചെയ്യുമ്പോൾ അതീവ ജാഗ്രത പുലർത്തണമെന്ന് ചീഫ് ജസ്റ്റിസ് സൂര്യ കാന്ത് ചൂണ്ടിക്കാട്ടി. യുവാക്കൾ അക്രമത്തിന്റെ വഴിയിലേക്ക് പോകാതിരിക്കാൻ അവരെ കേൾക്കുകയും ഉപദേശിക്കുകയും ശാന്തരാക്കുകയും ചെയ്യേണ്ടത് അനിവാര്യമാണെന്ന് അദ്ദേഹം പറഞ്ഞു.
“ശബ്ദമുയർത്തുന്നവരുടെ ശബ്ദം കേൾക്കുകയാണ് ഏറ്റവും ശക്തമായ ആയുധം. അവർ എന്തുകൊണ്ടാണ് പ്രതിഷേധിക്കുന്നത് എന്ന് മനസ്സിലാക്കാൻ ശ്രമിക്കണം,” എന്ന് കോടതി നിരീക്ഷിച്ചു. പ്രതിഷേധങ്ങൾ സമാധാനപരമായി നടക്കാൻ സാഹചര്യമൊരുക്കേണ്ടതുണ്ടെന്നും, എന്നാൽ ക്രമസമാധാന പരിപാലനത്തിൽ എങ്ങനെ ഇടപെടണമെന്ന് പൊലീസിനും ബന്ധപ്പെട്ട ഏജൻസികൾക്കും വ്യക്തമായ ധാരണയുണ്ടെന്നും സുപ്രീം കോടതി കൂട്ടിച്ചേർത്തു.
