സംസ്ഥാനം അതീവ ഗുരുതരമായ മഴക്കെടുതി പ്രതിസന്ധിയിലൂടെയാണ് കടന്നുപോകുന്നതെന്ന് പ്രതിപക്ഷനേതാവ് പിണറായി വിജയൻ. മഴക്കെടുതിയിൽ ജീവൻ നഷ്ടമായവർക്ക് ആദരാഞ്ജലി അർപ്പിച്ച അദ്ദേഹം, ദുരന്തമുഖത്ത് പകച്ചുനിൽക്കുന്ന ജനങ്ങളെയാണ് പല സ്ഥലങ്ങളിലും കാണാനായതെന്ന് പറഞ്ഞു. സർക്കാരിന്റെ ദുരിതാശ്വാസ-രക്ഷാപ്രവർത്തനങ്ങൾക്ക് പ്രതിപക്ഷത്തിന്റെ പൂർണ പിന്തുണ ഉണ്ടാകുമെന്നും കേരളം ഒന്നായി നിന്ന് പ്രതിസന്ധിയെ അതിജീവിക്കേണ്ട സമയമാണിതെന്നും അദ്ദേഹം വ്യക്തമാക്കി.
അതേസമയം, സുരക്ഷാ മുന്നൊരുക്കങ്ങളിലും ദുരന്തനിവാരണ നടപടികളിലും സർക്കാരിന് ഗുരുതര വീഴ്ച സംഭവിച്ചുവെന്നും പിണറായി വിജയൻ ആരോപിച്ചു. ചെറുപുഴ, പേരാവൂർ മേഖലകളിൽ ജനങ്ങൾ വലിയ ദുരിതം അനുഭവിച്ചുവെന്നും ജോസ് ഗിരിയിൽ ഒരാഴ്ച പിന്നിട്ടിട്ടും റോഡ് ഗതാഗതയോഗ്യമാക്കാൻ കഴിഞ്ഞിട്ടില്ലെന്നും അദ്ദേഹം ചൂണ്ടിക്കാട്ടി.
2018-ലെയും 2019-ലെയും പ്രളയങ്ങളെ ഓർമിപ്പിച്ച അദ്ദേഹം, കാലാവസ്ഥാ മുന്നറിയിപ്പുകൾ ലഭ്യമായിട്ടും ആവശ്യമായ മുൻകരുതലുകൾ സ്വീകരിച്ചില്ലെന്ന് വിമർശിച്ചു. വയനാട് തുരങ്കപാത ദുരന്തവും ഇതിന്റെ ഉദാഹരണമാണെന്ന് അദ്ദേഹം പറഞ്ഞു. മണ്ണിടിച്ചിൽ സാധ്യതയെക്കുറിച്ച് മുന്നറിയിപ്പ് ഉണ്ടായിട്ടും വേണ്ട നടപടികൾ സ്വീകരിച്ചില്ലെന്നും ആരോപിച്ചു.
മഴക്കെടുതിയിൽ മരിച്ച രാജേഷിന്റെ മൃതദേഹത്തോട് കാണിച്ച സമീപനവും അദ്ദേഹം വിമർശിച്ചു. മൃതദേഹം കൊണ്ടുപോകാൻ ഒരു ഫ്രീസർ ആംബുലൻസ് പോലും ഒരുക്കാനാകാത്തത് വലിയ അനാദരവാണെന്ന് അദ്ദേഹം പറഞ്ഞു. റാന്നിയിൽ വെള്ളപ്പൊക്കം രൂക്ഷമാകാൻ മഴയ്ക്കൊപ്പം മൂഴിയാർ ഡാം മതിയായ മുന്നറിയിപ്പില്ലാതെ തുറന്നതും കാരണമായെന്ന് ആരോപിച്ചു.
കടലിൽ മത്സ്യബന്ധനത്തിന് പോയി കാണാതായവരെ ഒരാഴ്ച കഴിഞ്ഞിട്ടും കണ്ടെത്താനായിട്ടില്ലെന്നും അവരുടെ കുടുംബങ്ങളോട് കൂടുതൽ കരുതലോടെയുള്ള സമീപനം വേണമായിരുന്നുവെന്നും അദ്ദേഹം പറഞ്ഞു. പത്തനംതിട്ടയിലെ ജില്ലാ അവലോകന യോഗത്തിൽ പ്രതിപക്ഷ എംഎൽഎയെ ഒഴിവാക്കിയത് ശരിയായ നടപടിയല്ലെന്നും, എല്ലാവരെയും ചേർത്ത് നിർത്താനുള്ള സമീപനമാണ് സർക്കാർ സ്വീകരിക്കേണ്ടതെന്നും അദ്ദേഹം കൂട്ടിച്ചേർത്തു.
