മുഖ്യമന്ത്രി വി.ഡി. സതീശൻ നയിക്കുന്ന യുഡിഎഫ് സർക്കാരിനും മുസ്ലിം ലീഗിനുമെതിരെ കടുത്ത വിമർശനവുമായി സിപിഎം സംസ്ഥാന സെക്രട്ടേറിയറ്റ് അംഗം പി. ജയരാജൻ. കേരളത്തിൽ സംഘപരിവാർ ശക്തികൾക്ക് വളരാനുള്ള സാഹചര്യം സർക്കാർ സൃഷ്ടിക്കുകയാണെന്നും മുസ്ലിം ലീഗിന്റെ സമീപനങ്ങൾ വർഗീയ ധ്രുവീകരണത്തിന് വഴിവെക്കുന്നതാണെന്നും അദ്ദേഹം ആരോപിച്ചു.
കണ്ണൂരിൽ മാധ്യമങ്ങളോട് സംസാരിക്കവെ, വി.ഡി. സതീശൻ മുഖ്യമന്ത്രിയായതിൽ ഏറ്റവും കൂടുതൽ സന്തോഷിക്കുന്നത് സംഘപരിവാർ ശക്തികളാണെന്ന് ജയരാജൻ പറഞ്ഞു. യുഡിഎഫ് സർക്കാർ അധികാരത്തിലെത്തി 120 ദിവസത്തിലേറെയായിട്ടും ആർഎസ്എസിനെയോ സംഘപരിവാറിനെയോ അസ്വസ്ഥരാക്കുന്ന ഒരു നടപടിപോലും സർക്കാരിന്റെ ഭാഗത്ത് നിന്നുണ്ടായിട്ടില്ലെന്നും അദ്ദേഹം വിമർശിച്ചു.
കേരളത്തിലെ രാഷ്ട്രീയ സാഹചര്യത്തെ വിലയിരുത്തുമ്പോൾ സംഘപരിവാർ ശക്തികൾക്ക് അനുകൂലമായ അന്തരീക്ഷമാണ് നിലവിലുള്ളതെന്ന് ജയരാജൻ ആരോപിച്ചു. ബംഗാളിൽ സ്വീകരിച്ച രാഷ്ട്രീയ തന്ത്രങ്ങൾ കേരളത്തിലും നടപ്പാക്കാൻ ശ്രമിക്കുന്നതിനുള്ള അവസരമായാണ് അവർ നിലവിലെ ഭരണത്തെ കാണുന്നതെന്നും അദ്ദേഹം പറഞ്ഞു.
രാജ്യത്ത് വർഗീയത ശക്തിപ്പെടുന്നതിന് പിന്നിൽ കോർപ്പറേറ്റ് താൽപര്യങ്ങളും പ്രവർത്തിക്കുന്നുണ്ടെന്ന് ആരോപിച്ച ജയരാജൻ, അതിന് മറുപടിയായി ചിലർ മുസ്ലിം ഏകീകരണം മുന്നോട്ടുവെക്കുകയാണെന്നും അഭിപ്രായപ്പെട്ടു. ഹിന്ദു ഏകീകരണത്തിന്റെയും മുസ്ലിം ഏകീകരണത്തിന്റെയും രാഷ്ട്രീയം സമൂഹത്തിൽ കൂടുതൽ ധ്രുവീകരണം സൃഷ്ടിക്കുമെന്ന ആശങ്കയും അദ്ദേഹം പങ്കുവെച്ചു.
മുസ്ലിം ലീഗിന്റെ സമീപകാല രാഷ്ട്രീയ നിലപാടുകളും പ്രവർത്തനങ്ങളും വിമർശിച്ച ജയരാജൻ, പാർട്ടിയുടെ രാഷ്ട്രീയ സമീപനം വർഗീയ ധ്രുവീകരണത്തിന് സഹായകമാകുന്നുവെന്ന ആരോപണവും ഉന്നയിച്ചു.
