സിപിഎമ്മിന്റെ മുതിര്‍ന്ന നേതാവ് വി എസ് അച്യുതാനന്ദനെ പുകഴ്ത്തി ബിജെപി നേതാവ് സന്ദീപ് വാര്യര്‍ രംഗത്ത്. പാലക്കാട്ടെ ബിജെപി സ്ഥാനാര്‍ത്ഥി സി കൃഷ്ണകുമാര്‍ ഒരു ചാനലിന് നല്‍കിയ അഭിമുഖത്തിന്റെ വീഡിയോ സഹിതമാണ് സന്ദീപിന്റെ പ്രതികരണം ഉണ്ടായത്.

വി എസ് കാണിച്ചത് യഥാര്‍ത്ഥ സംസ്‌കാരമെന്നാണ് സന്ദീപ് ഫെയ്‌സ്ബുക്ക് കുറിപ്പില്‍ വ്യക്തമാക്കുന്നത്. അഭിമുഖത്തില്‍ കൃഷ്ണകുമാര്‍ പറയുന്നത് ചൂണ്ടിക്കാട്ടി ഇത്രയേ ഞാനും പറഞ്ഞുള്ളൂവെന്നും സന്ദീപ് വാര്യര്‍ കുറിച്ചു.നിയമസഭ തെരഞ്ഞെടുപ്പില്‍ മലമ്പുഴയില്‍ വി എസ് അച്യുതാനന്ദന്‍ മത്സരിച്ചപ്പോള്‍, ബിജെപി സ്ഥാനാര്‍ത്ഥിയായിട്ടാണ് കൃഷ്ണകുമാര്‍ തെരഞ്ഞെടുപ്പ് രാഷ്ട്രീയത്തിലേക്ക് പ്രവേശിച്ചത്.

അന്ന് തെരഞ്ഞെടുപ്പ് കലാശക്കൊട്ടിന്റെ തലേന്ന് തന്റെ അമ്മ മരിച്ചപ്പോള്‍ വി എസ് വീട്ടില്‍ എത്തി ആശ്വസിപ്പിച്ചതായി കൃഷ്ണകുമാര്‍ അഭിമുഖത്തില്‍ പറയുന്നു. താന്‍ ഇപ്പോഴും ബഹുമാനിക്കുന്ന നേതാവാണ് വി എസ് എന്നും കൃഷ്ണകുമാര്‍ പറയുന്നുണ്ട്. ഇത് ചൂണ്ടിക്കാട്ടിയാണ് സന്ദീപ് വാര്യരുടെ വിശദീകരണം ഉണ്ടായത്.