വയനാട്ടിൽ എട്ട് വിദ്യാർത്ഥികൾക്ക് ഷിഗെല്ല സ്ഥിരീകരിച്ചതോടെ ജില്ലയിൽ കനത്ത ജാഗ്രത തുടരുന്നു. രോഗബാധിതരായ കുട്ടികളുമായി സമ്പർക്കത്തിൽ വന്നവർ പഠിക്കുന്ന 13 വിദ്യാഭ്യാസ സ്ഥാപനങ്ങൾക്കാണ് ജില്ലാ ഭരണകൂടം അവധി പ്രഖ്യാപിച്ചത്. അടിയന്തര സാഹചര്യത്തിൽ വിദ്യാർത്ഥികളും രക്ഷിതാക്കളും അധ്യാപകരും ആരോഗ്യവകുപ്പിന്റെ നിർദ്ദേശങ്ങൾ കർശനമായി പാലിക്കണമെന്ന് അധികൃതർ മുന്നറിയിപ്പ് നൽകി.

കുട്ടികളുമായി അനാവശ്യ യാത്രകൾ നടത്തുന്നതും പൊതുചടങ്ങുകളിൽ പങ്കെടുക്കുന്നതും ബന്ധുവീടുകൾ സന്ദർശിക്കുന്നതും പൂർണ്ണമായും ഒഴിവാക്കണം. കുടിക്കാനും മറ്റ് ആവശ്യങ്ങൾക്കും തിളപ്പിച്ചാറ്റിയ വെള്ളം മാത്രം ഉപയോഗിക്കാൻ ശ്രദ്ധിക്കണം. പനി, വയറിളക്കം, വയറുവേദന, ഛർദ്ദി തുടങ്ങിയ ലക്ഷണങ്ങൾ ശ്രദ്ധയിൽപ്പെട്ടാൽ യാതൊരു കാരണവശാലും സ്വയം ചികിത്സ നടത്താതെ ഉടൻ തന്നെ ആരോഗ്യകേന്ദ്രങ്ങളിൽ ചികിത്സ തേടണം.

ബത്തേരി മാർ ബസേലിയോസ് എയുപി സ്കൂളിലെ കിണർ വെള്ളം പരിശോധിച്ചതിൽ ബാക്ടീരിയകളുടെ സാന്നിധ്യം കണ്ടെത്തിയതിനെത്തുടർന്ന് വെള്ളം ഉപയോഗിക്കാൻ പാടില്ലെന്ന് നിർദ്ദേശിച്ചിട്ടുണ്ട്. ഇതിന്റെ ഭാഗമായി വിവിധ പഞ്ചായത്തുകളിലായി 969 കിണറുകൾ അണുവിമുക്തമാക്കുന്നതിനായി ക്ലോറിനേഷൻ പൂർത്തിയാക്കി.

നിലവിൽ 44 വിദ്യാർത്ഥികൾ ചികിത്സയിൽ കഴിയുന്നുണ്ട്. കോളിയാടി സ്കൂളിലെ വിദ്യാർത്ഥികളുമായി സമ്പർക്കത്തിലുണ്ടായിരുന്ന 27 കുട്ടികളിൽ കൂടി രോഗലക്ഷണങ്ങൾ കണ്ടുതുടങ്ങിയിട്ടുണ്ട്. ഇതുവരെ ആകെ 502 പേർക്കാണ് രോഗലക്ഷണങ്ങൾ റിപ്പോർട്ട് ചെയ്തിരിക്കുന്നത്. എല്ലാവരും ആരോഗ്യവകുപ്പിന്റെ നിർദ്ദേശങ്ങൾ കണിശമായി പാലിക്കണമെന്ന് അധികൃതർ ആവർത്തിച്ചു വ്യക്തമാക്കി.