സംസ്ഥാന രാഷ്ട്രീയവും സാമ്പത്തിക രംഗവും ഒരുപോലെ ഉറ്റുനോക്കുന്ന യുഡിഎഫ് സർക്കാരിന്റെ ആദ്യ ബജറ്റ് ഇന്ന് നിയമസഭയിൽ അവതരിപ്പിക്കും. പ്രതിപക്ഷ നേതാവായിരിക്കെ മുൻ എൽഡിഎഫ് സർക്കാരിന്റെ സാമ്പത്തിക നയങ്ങളെയും ധനകാര്യ മാനേജ്‌മെന്റിനെയും ശക്തമായി വിമർശിച്ചിരുന്ന വി.ഡി. സതീശൻ ധനമന്ത്രിയായ ശേഷം അവതരിപ്പിക്കുന്ന ആദ്യ ബജറ്റെന്ന നിലയിൽ പ്രത്യേക ശ്രദ്ധയാണ് ഇതിന് ലഭിക്കുന്നത്.

എൽഡിഎഫ് സർക്കാർ നടപ്പിലാക്കിയ വിവിധ ക്ഷേമപദ്ധതികൾ തുടരുമോ, അതിൽ മാറ്റങ്ങളുണ്ടാകുമോ എന്നതാണ് പൊതുജനങ്ങൾ ഉറ്റുനോക്കുന്ന പ്രധാന വിഷയം. സംസ്ഥാനത്തിന്റെ സാമ്പത്തിക പ്രതിസന്ധി മറികടക്കുന്നതിനൊപ്പം ക്ഷേമച്ചെലവുകൾ നിലനിർത്താനുള്ള സമീപനവും ബജറ്റിലൂടെ വ്യക്തമാകുമെന്നാണ് വിലയിരുത്തൽ.

സംസ്ഥാനത്തിന്റെ തനത് വരുമാനം വർധിപ്പിക്കുന്നതിനും നികുതി ചോർച്ച തടയുന്നതിനും സർക്കാർ കൂടുതൽ പ്രാധാന്യം നൽകുമെന്നാണ് സൂചന. സ്വർണ വ്യാപാര മേഖലയിലെ നികുതി പിരിവ് കാര്യക്ഷമമാക്കിയാൽ മാത്രം ആയിരക്കണക്കിന് കോടിയുടെ അധിക വരുമാനം നേടാനാകുമെന്ന നിലപാട് വി.ഡി. സതീശൻ നേരത്തെ വ്യക്തമാക്കിയിരുന്നു. തുറമുഖ നഗരം, ഏവിയേഷൻ ഹബ് തുടങ്ങിയ വികസന പദ്ധതികളും ബജറ്റിലെ പ്രധാന പ്രഖ്യാപനങ്ങളാകാൻ സാധ്യതയുണ്ട്.

അതേസമയം, വിഴിഞ്ഞം തുറമുഖവുമായി ബന്ധപ്പെട്ട അടിസ്ഥാന സൗകര്യ വികസനം, റിങ് റോഡ്, റെയിൽവേ കോറിഡോർ തുടങ്ങിയ വൻകിട പദ്ധതികൾക്കുള്ള ധനവിനിയോഗവും നിർണായകമാകും. വയനാട് തുരങ്കപാത, ദേശീയപാത വികസനം, തീരദേശപാത തുടങ്ങിയ മുൻ സർക്കാർ ആരംഭിച്ച പദ്ധതികളോട് പുതിയ സർക്കാരിന്റെ സമീപനം എന്തായിരിക്കുമെന്നതും ശ്രദ്ധേയമാണ്.

കെ-റെയിൽ പദ്ധതിക്കെതിരെ ശക്തമായ നിലപാട് സ്വീകരിച്ചിരുന്ന യുഡിഎഫ് സർക്കാർ അധികാരത്തിലെത്തിയ സാഹചര്യത്തിൽ, അതിവേഗ റെയിൽ ഗതാഗത സംവിധാനങ്ങളെക്കുറിച്ചുള്ള ഭാവി നയം ബജറ്റിലൂടെ വ്യക്തമാകുമെന്നാണ് പ്രതീക്ഷ. കൂടാതെ, കേന്ദ്രത്തിൽ നിന്ന് ലഭിക്കേണ്ട റെവന്യൂ ഡെഫിസിറ്റ് ഗ്രാന്റിലെ കുറവ് മറികടക്കാൻ പുതിയ സാമ്പത്തിക നിർദേശങ്ങളും ബജറ്റിൽ ഉൾപ്പെടാൻ സാധ്യതയുണ്ട്.

സംസ്ഥാനത്തിന്റെ സാമ്പത്തിക ദിശയും വികസന കാഴ്ചപ്പാടും നിർണയിക്കുന്ന നിർണായക രേഖയായിരിക്കും വി.ഡി. സതീശന്റെ ആദ്യ ബജറ്റെന്നാണ് രാഷ്ട്രീയ-സാമ്പത്തിക നിരീക്ഷകരുടെ വിലയിരുത്തൽ.