യുഡിഎഫ് സർക്കാരിന്റെ ആദ്യ ബജറ്റിൽ ആശാ പ്രവർത്തകർക്ക് പ്രതീക്ഷിച്ച ആനുകൂല്യങ്ങൾ ലഭിക്കാതെ വന്നത് നിരാശയ്ക്കിടയാക്കി. ആശമാരുടെ ഓണറേറിയം 21,000 രൂപയാക്കി ഉയർത്തുമെന്നായിരുന്നു യുഡിഎഫ് തെരഞ്ഞെടുപ്പ് വാഗ്ദാനം. എന്നാൽ ബജറ്റിൽ ഓണറേറിയം വർധന സംബന്ധിച്ച് യാതൊരു പ്രഖ്യാപനവും ഉണ്ടായില്ല.

ഇന്ദിരാ ഗ്യാരന്റിയുടെ പ്രധാന വാഗ്ദാനങ്ങളിലൊന്നായ സ്ത്രീകൾക്കുള്ള സൗജന്യ കെഎസ്ആർടിസി യാത്രയും പൂർണമായും നടപ്പിലായിട്ടില്ലെന്ന വിമർശനവും ശക്തമാണ്. ജൂൺ 15 മുതൽ പദ്ധതി ആരംഭിച്ചെങ്കിലും നിലവിൽ കെഎസ്ആർടിസിയുടെ ഓർഡിനറി സർവീസുകളിൽ മാത്രമാണ് ഇളവ് ലഭ്യമാകുന്നത്. ഇതുമൂലം സംസ്ഥാനത്തെ വലിയൊരു വിഭാഗം സ്ത്രീകൾക്ക് പദ്ധതിയുടെ പ്രയോജനം ലഭിക്കുന്നില്ലെന്നാണ് ആക്ഷേപം.

ഒരു കുടുംബത്തിന് 25 ലക്ഷം രൂപയുടെ ഇൻഷുറൻസ് പരിരക്ഷ ഉറപ്പാക്കുമെന്ന വാഗ്ദാനവുമായി പ്രഖ്യാപിച്ച ഉമ്മൻചാണ്ടി ഇൻഷുറൻസ് പദ്ധതിയുടെ ഭാവിയെക്കുറിച്ചും സംശയങ്ങൾ ഉയരുന്നുണ്ട്. പദ്ധതിക്കായി ബജറ്റിൽ വെറും 10 കോടി രൂപ മാത്രമാണ് വകയിരുത്തിയിരിക്കുന്നത്. തെരഞ്ഞെടുപ്പ് കാലത്ത് പ്രഖ്യാപിച്ച പല ജനക്ഷേമ പദ്ധതികൾക്കും നാമമാത്രമായ തുകയാണ് അനുവദിച്ചതെന്നാണ് വിമർശനം.

അതേസമയം, സംസ്ഥാനത്തിന്റെ തനത് വരുമാനം ദേശീയ ശരാശരിയേക്കാൾ താഴെയാണെന്ന് ബജറ്റ് അവതരണത്തിനിടെ മുഖ്യമന്ത്രി വി.ഡി. സതീശൻ ചൂണ്ടിക്കാട്ടി. കിഫ്ബിയെ സമഗ്രമായി പുനഃസംഘടിപ്പിക്കുമെന്നും ആരോഗ്യ, വിദ്യാഭ്യാസ മേഖലകളിൽ കൂടുതൽ നിക്ഷേപം ഉറപ്പാക്കുമെന്നും അദ്ദേഹം വ്യക്തമാക്കി.

സംസ്ഥാനത്തിന്റെ സാമ്പത്തിക വികസനത്തിന് പുതിയ ദിശ നൽകുന്ന പദ്ധതികൾക്കും ബജറ്റിൽ പ്രാധാന്യം നൽകിയിട്ടുണ്ട്. അടുത്ത അഞ്ച് വർഷത്തിനുള്ളിൽ കേരളത്തെ ആഗോള മാരിടൈം ശക്തിയായി ഉയർത്തുകയാണ് ലക്ഷ്യമെന്ന് സർക്കാർ പ്രഖ്യാപിച്ചു. വിഴിഞ്ഞം റിങ് റോഡിനായുള്ള ഭൂമി ഏറ്റെടുക്കൽ വേഗത്തിലാക്കുമെന്നും കപ്പൽ നിർമ്മാണ കേന്ദ്രം സ്ഥാപിക്കുമെന്നും പ്രദേശവാസികൾക്ക് പ്രത്യേക തൊഴിൽ സംവരണം ഉറപ്പാക്കുമെന്നും ബജറ്റിൽ പറയുന്നു.

തുറമുഖ നഗര പദ്ധതിയിലേക്ക് സ്വകാര്യ നിക്ഷേപം ആകർഷിക്കാനും കേരള മാരിടൈം പോളിസി രൂപീകരിക്കാനും സർക്കാർ തീരുമാനിച്ചിട്ടുണ്ട്. ‘മിഷൻ സമുദ്ര’ പദ്ധതിക്കായി 400 കോടി രൂപയും ഏവിയേഷൻ ഹബ്ബിനായി 200 കോടി രൂപയും കേരള ഹെൽത്ത് ആൻഡ് ലൈഫ് സയൻസ് സിറ്റിക്കായി 100 കോടി രൂപയും ബജറ്റിൽ വകയിരുത്തിയിട്ടുണ്ട്.

ജനക്ഷേമ വാഗ്ദാനങ്ങൾക്കും വികസന പദ്ധതികൾക്കുമിടയിൽ സമതുലനം കണ്ടെത്താനുള്ള ശ്രമമാണ് ബജറ്റിൽ പ്രകടമാകുന്നതെങ്കിലും, തെരഞ്ഞെടുപ്പ് വാഗ്ദാനങ്ങൾ നടപ്പാക്കുന്നതിൽ സർക്കാർ എത്രത്തോളം മുന്നോട്ട് പോകുമെന്ന ചോദ്യമാണ് ഇപ്പോൾ ഉയരുന്നത്.