ജനാധിപത്യ സ്ഥാപനങ്ങളെ ദുർബലപ്പെടുത്തുകയും രാഷ്ട്രീയ കൂറുമാറ്റങ്ങളെ ആശ്രയിച്ച് പാർലമെന്റിലെ ശക്തി വർധിപ്പിക്കാൻ ബിജെപി ശ്രമിക്കുകയാണെന്നും സിപിഐ(എം) പൊളിറ്റ് ബ്യൂറോ ആരോപിച്ചു. ജൂൺ 26, 27 തീയതികളിൽ ചേർന്ന പൊളിറ്റ് ബ്യൂറോ യോഗത്തിന് ശേഷം പുറത്തിറക്കിയ പ്രസ്താവനയിലാണ് പാർട്ടി കേന്ദ്ര സർക്കാരിനും ബിജെപിക്കുമെതിരെ രൂക്ഷ വിമർശനം ഉന്നയിച്ചത്.

പാർലമെന്റിൽ മൂന്നിൽ രണ്ട് ഭൂരിപക്ഷം ലക്ഷ്യമിട്ട് ബിജെപി പ്രതിപക്ഷത്തെയും പ്രാദേശിക പാർട്ടികളെയും ലക്ഷ്യമാക്കി ‘ഓപ്പറേഷൻ ലോട്ടസ്’ നടപ്പാക്കുകയാണെന്ന് സിപിഐ(എം) ആരോപിച്ചു. ഇത്തരം നീക്കങ്ങൾ ജനാധിപത്യ മൂല്യങ്ങളെയും കൂറുമാറ്റ വിരുദ്ധ നിയമങ്ങളുടെ ആത്മാവിനെയും ദുർബലപ്പെടുത്തുന്നതാണെന്നും പാർട്ടി ചൂണ്ടിക്കാട്ടി.

സ്പെഷ്യൽ ഇന്റൻസീവ് റിവിഷൻ (എസ്‌ഐആർ) നടപടികളുടെ പേരിൽ വിവിധ സംസ്ഥാനങ്ങളിലെ വോട്ടർമാർക്ക് അവകാശനിഷേധം സംഭവിക്കുന്നുവെന്ന് ആരോപിച്ച സിപിഐ(എം), തിരഞ്ഞെടുപ്പ് കമ്മീഷന്റെ പ്രവർത്തനത്തെയും വിമർശിച്ചു. തിരഞ്ഞെടുപ്പ് പ്രക്രിയയിൽ കൂടുതൽ സുതാര്യതയും ഉത്തരവാദിത്തവും ഉറപ്പാക്കണമെന്ന് ആവശ്യപ്പെട്ട് രാജ്യവ്യാപക പ്രചാരണം സംഘടിപ്പിക്കുമെന്നും പാർട്ടി പ്രഖ്യാപിച്ചു.

പൗരത്വവുമായി ബന്ധപ്പെട്ട വിഷയങ്ങളിലും പാർട്ടി ആശങ്ക രേഖപ്പെടുത്തി. പാസ്‌പോർട്ടും പൗരത്വ പരിശോധനയുമായി ബന്ധപ്പെട്ട സമീപകാല നടപടികൾ സമൂഹത്തിലെ ചില വിഭാഗങ്ങളെ പ്രതികൂലമായി ബാധിക്കുമെന്നാണ് സിപിഐ(എം)യുടെ ആരോപണം. ഒഴിവാക്കപ്പെട്ട വോട്ടർ പട്ടിക എൻട്രികൾ പുനഃസ്ഥാപിക്കണമെന്നും തിരിച്ചറിയൽ രേഖകളുടെ നിയമസാധുത സംബന്ധിച്ച് വ്യക്തത വരുത്തണമെന്നും പാർട്ടി ആവശ്യപ്പെട്ടു.

നീറ്റ്, സിബിഎസ്ഇ, സിയുഇടി ഉൾപ്പെടെയുള്ള ദേശീയ തല പരീക്ഷകളുടെ നടത്തിപ്പിലും ഗുരുതര വീഴ്ചകൾ ഉണ്ടായതായി ആരോപിച്ച സിപിഐ(എം), പരീക്ഷാ സംവിധാനങ്ങളിൽ സമഗ്ര പരിഷ്കാരവും കൂടുതൽ വികേന്ദ്രീകരണവും വേണമെന്ന് ആവശ്യപ്പെട്ടു.

പൊതു സ്ഥാപനങ്ങളുമായി ബന്ധപ്പെട്ട സാമ്പത്തിക ക്രമക്കേടുകളെക്കുറിച്ചും പാർട്ടി പ്രതികരിച്ചു. അഴിമതി ആരോപണങ്ങളിൽ നിഷ്പക്ഷമായ അന്വേഷണം നടത്തി എല്ലാ തലങ്ങളിലും ഉത്തരവാദിത്തം ഉറപ്പാക്കണമെന്ന് പൊളിറ്റ് ബ്യൂറോ ആവശ്യപ്പെട്ടു.

അതേസമയം, പശ്ചിമേഷ്യയിലെ സംഘർഷാവസ്ഥയിലും പാർട്ടി ആശങ്ക പ്രകടിപ്പിച്ചു. യുഎസ്–ഇറാൻ ധാരണയുണ്ടായിട്ടും മേഖലയിൽ സമാധാനം ഉറപ്പായിട്ടില്ലെന്നും, രാജ്യത്തെ ജനങ്ങളുടെ താൽപര്യം മുൻനിർത്തി ഇന്ധനവില നിയന്ത്രിക്കാനും കാർഷിക മേഖലയ്ക്ക് ആവശ്യമായ വളം ലഭ്യമാക്കാനും കേന്ദ്ര സർക്കാർ നടപടി സ്വീകരിക്കണമെന്നും സിപിഐ(എം) ആവശ്യപ്പെട്ടു.

സിപിഐ(എം) കേന്ദ്ര കമ്മിറ്റി യോഗം ജൂലൈ 11 മുതൽ 13 വരെ ന്യൂഡൽഹിയിൽ നടക്കുമെന്നും പ്രസ്താവനയിൽ അറിയിച്ചു.