അദാനി ഗ്രൂപ്പിന്റെ വിഴിഞ്ഞം തുറമുഖ ഓഹരി കൈമാറ്റം പുതിയ ബജറ്റിലെ സമുദ്ര മിഷൻ നിർദ്ദേശങ്ങൾ ഉയർത്തുന്ന ആശങ്കകളെ അടിവരയിട്ട് ശരിവെക്കുന്നതാണെന്ന് ഡോ. ടി.എം. തോമസ് ഐസക്. തുറമുഖത്തിന്റെ യഥാർത്ഥ ഉടമസ്ഥരായ കേരള സർക്കാരിനോട് ഒരു വാക്ക് പോലും ആലോചിക്കാതെ അദാനി ഇത്തരമൊരു വൻ നീക്കത്തിന് മുതിർന്നതിന് പിന്നിൽ പുതിയ ബജറ്റ് നിർദ്ദേശങ്ങളാണെന്ന് അദ്ദേഹം തന്റെ ഫേസ്ബുക്ക് പോസ്റ്റിൽ ആരോപിച്ചു.

വെറും 2497 കോടി രൂപ മുടക്കിയ അദാനി, തന്റെ കമ്പനിയുടെ 49 ശതമാനം ഓഹരികൾ മാത്രം 13,000 കോടി രൂപയ്ക്ക് മറിച്ചു വിൽക്കുമ്പോൾ ഈ ബിസിനസ്സ് ഡീലിന്റെ ഭീമമായ വലുപ്പവും അതിന് പിന്നിലെ താല്പര്യങ്ങളും എത്രത്തോളമാണെന്ന് ജനങ്ങൾക്ക് എളുപ്പം മനസ്സിലാക്കാവുന്നതേയുള്ളൂ എന്നും തോമസ് ഐസക് ചൂണ്ടിക്കാട്ടി.

ഈ വൻ ഓഹരി കൈമാറ്റവുമായി ബന്ധപ്പെട്ട് മുഖ്യമന്ത്രി വി.ഡി. സതീശനെതിരെ ഗുരുതരമായ ആരോപണങ്ങളാണ് തോമസ് ഐസക് ഉന്നയിച്ചിരിക്കുന്നത്. അദാനി കമ്പനി അധികൃതരുമായി ഏതെങ്കിലും ഘട്ടത്തിൽ അനൗദ്യോഗികമായി ഈ ഓഹരി വിൽപ്പനയെക്കുറിച്ച് ചർച്ച നടത്തിയിട്ടുണ്ടോ എന്ന് മുഖ്യമന്ത്രി വ്യക്തമാക്കണമെന്ന് അദ്ദേഹം ആവശ്യപ്പെട്ടു.

തിരഞ്ഞെടുപ്പ് വിജയത്തിന് തൊട്ടുപിന്നാലെ, മംഗലാപുരത്ത് വെച്ച് അദാനി ഗ്രൂപ്പ് പ്രതിനിധികളെ കാണാനായി മുഖ്യമന്ത്രി ചാർട്ടേർഡ് വിമാനത്തിൽ നടത്തിയ സന്ദർശനം ദുരൂഹത നിറഞ്ഞതായിരുന്നു. കേരള സർക്കാരിനെ പൂർണ്ണമായും ഇരുട്ടിൽ നിർത്തിക്കൊണ്ട് അദാനി ഗ്രൂപ്പ് ഇത്രയും വലിയൊരു നീക്കം ഒറ്റയ്ക്ക് നടത്തിയെന്ന് പറയുന്നത് അവിശ്വസനീയമാണെന്നും ഇതിൽ വലിയ ഒത്തുകളി നടന്നിട്ടുണ്ടെന്നും തോമസ് ഐസക് കൂട്ടിച്ചേർത്തു.