കാസർഗോഡ് ജില്ലയിലെ എണ്ണപ്പാറയിലെ സിപിഐ എം ലോക്കൽ കമ്മിറ്റി ഓഫീസ് തകർത്ത സംഭവത്തിൽ രണ്ട് ബിജെപി പ്രവർത്തകരെ പൊലീസ് അറസ്റ്റ് ചെയ്തു. തായന്നൂർ സ്വദേശികളായ വിശാൽ കെ. ബാബുവിനെയും അഭിനവിനെയുമാണ് അമ്പലത്തറ പൊലീസ് പിടികൂടിയത്.

ബുധനാഴ്ചയാണ് സിപിഐ എം ഓഫീസ് തകർത്ത നിലയിൽ കണ്ടെത്തിയത്. ഓഫീസിലെ ജനൽച്ചില്ലുകൾ, ഫർണിച്ചറുകൾ, കൊടിമരങ്ങൾ എന്നിവ നശിപ്പിക്കപ്പെട്ടിരുന്നു. സംഭവത്തിൽ ഒരു ലക്ഷത്തിലധികം രൂപയുടെ നാശനഷ്ടമുണ്ടായതായി പൊലീസ് അറിയിച്ചു.

സമീപത്തെ വീടുകളിലെയും വ്യാപാര സ്ഥാപനങ്ങളിലെയും സിസിടിവി ദൃശ്യങ്ങൾ ശേഖരിച്ചാണ് പ്രതികളെ തിരിച്ചറിഞ്ഞത്. തുടർന്ന് അമ്പലത്തറ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. അന്വേഷണത്തിനിടെ പ്രതികളിലൊരാൾ പരിയാരം ഗവ. മെഡിക്കൽ കോളേജ് ആശുപത്രിയിൽ ചികിത്സ തേടിയതായി കണ്ടെത്തിയതോടെ ഇരുവരെയും കസ്റ്റഡിയിലെടുക്കുകയായിരുന്നു.

അറസ്റ്റിലായ പ്രതികളെ ചോദ്യം ചെയ്തപ്പോൾ, സ്കൂൾകാലം മുതൽ സിപിഐ എമ്മിനോട് വിരോധം ഉണ്ടായിരുന്നുവെന്നും സ്കൂളിലെ ആർഎസ്എസ് പ്രവർത്തനങ്ങൾ പാർട്ടി തടഞ്ഞിരുന്നുവെന്നും അവർ അന്വേഷണ ഉദ്യോഗസ്ഥരോട് പറഞ്ഞതായി പൊലീസ് അറിയിച്ചു.

പ്രതികളിൽ ഒരാൾ അടുത്തിടെ വിദേശത്ത് നിന്ന് നാട്ടിലെത്തിയയാളാണെന്നും പൊലീസ് വ്യക്തമാക്കി. സംഭവസമയത്ത് ഇരുവരും മദ്യലഹരിയിലായിരുന്നുവെന്നാണ് അന്വേഷണസംഘത്തിന്റെ പ്രാഥമിക നിഗമനം.

ബുധനാഴ്ച വൈകീട്ടാണ് ഇരുവരെയും ഔദ്യോഗികമായി അറസ്റ്റ് ചെയ്തത്. പിന്നീട് കോടതിയിൽ ഹാജരാക്കിയ പ്രതികളെ ജുഡീഷ്യൽ കസ്റ്റഡിയിൽ വിട്ടതായി പൊലീസ് അറിയിച്ചു.