പശ്ചിമ ബംഗാളിലെ നാദിയ ജില്ലയിൽ തൃണമൂൽ കോൺഗ്രസിനും ബിജെപിക്കുമുള്ള തിരിച്ചടിയായി 200ഓളം കുടുംബങ്ങൾ സിപിഐഎമ്മിൽ ചേർന്നു. ഹരിൻഘട്ട പോലീസ് സ്റ്റേഷൻ പരിധിയിലെ ബിറോഹി നമ്പർ 1 ഗ്രാമപഞ്ചായത്തിലെ സോനാഖാലി പഞ്ച്പുകുരിയ പ്രദേശത്താണ് കൂട്ടച്ചേരൽ നടന്നത്. ഇതോടെ മേഖലയിലെ രാഷ്ട്രീയ രംഗം കൂടുതൽ സജീവമായിരിക്കുകയാണ്.

സിപിഐഎം സംഘടിപ്പിച്ച പ്രത്യേക ചടങ്ങിൽ തൃണമൂലും ബിജെപിയും വിട്ട പ്രവർത്തകരും അനുഭാവികളും ചെങ്കൊടി ഏറ്റുവാങ്ങി. പ്രദേശത്തെ തൃണമൂൽ പ്രവർത്തകനായിരുന്ന കമുലാണ് ഈ കൂട്ടച്ചേരലിന് നേതൃത്വം നൽകിയതെന്നാണ് വിവരം.

പാർട്ടി മാറിയ പ്രവർത്തകർ രൂക്ഷ വിമർശനമാണ് ഉന്നയിച്ചത്. അഴിമതിയും ജനവിരുദ്ധ നിലപാടുകളുമാണ് തങ്ങളെ തൃണമൂൽ വിടാൻ പ്രേരിപ്പിച്ചതെന്ന് അവർ ആരോപിച്ചു. സാധാരണ ജനങ്ങളുടെ പ്രശ്നങ്ങളിൽ ഭരണകക്ഷി ശ്രദ്ധ ചെലുത്തുന്നില്ലെന്നും അവർ പറഞ്ഞു.

സിപിഐഎം ഹരിൻഘട്ട ഏരിയ കമ്മിറ്റി നേതാവ് ഷിബെൻ ദേബ്നാഥ്, തൃണമൂലിനോടും ബിജെപിയോടുമുള്ള ജനങ്ങളുടെ നിരാശയാണ് ഈ രാഷ്ട്രീയ മാറ്റത്തിന് കാരണമായതെന്ന് പ്രതികരിച്ചു. ഇരു പാർട്ടികളിലും വിശ്വാസം നഷ്ടപ്പെട്ട ജനങ്ങൾ ബദലായി ഇടതുപക്ഷത്തെ തെരഞ്ഞെടുക്കുകയാണെന്നും അദ്ദേഹം പറഞ്ഞു.

കൂട്ടച്ചേരലോടെ ഹരിൻഘട്ട മേഖലയിലെ സിപിഐഎം സംഘടന കൂടുതൽ ശക്തിപ്പെട്ടതായാണ് രാഷ്ട്രീയ നിരീക്ഷകരുടെ വിലയിരുത്തൽ. വരും ദിവസങ്ങളിൽ ഇത് ജില്ലയിലെ രാഷ്ട്രീയ സമവാക്യങ്ങളിൽ പ്രതിഫലിക്കുമെന്നാണ് വിലയിരുത്തൽ.