സംസ്ഥാന സ്കൂൾ കായികമേളയുടെ നടത്തിപ്പിൽ ഗുരുതര വീഴ്ചകളുണ്ടായെന്ന് ആരോപിച്ച് സർക്കാരിനെതിരെ വിമർശനവുമായി പി. രാജീവ്. കുട്ടികളുടെ ജീവൻ വെച്ചുള്ള കളിയാക്കി കായികമേളയെ മാറ്റിയ സർക്കാർ നാടിന് അപമാനമാണെന്ന് അദ്ദേഹം ഫേസ്ബുക്ക് കുറിപ്പിൽ പറഞ്ഞു. മേളയുമായി ബന്ധപ്പെട്ട വീഴ്ചകളിൽ സമഗ്രമായ അന്വേഷണം അടിയന്തരമായി നടത്തണമെന്നും അദ്ദേഹം ആവശ്യപ്പെട്ടു.

തൃശൂർ അക്വാട്ടിക് കോംപ്ലക്സിലെ താൽക്കാലിക മേൽക്കൂരയിലെ ഷീറ്റുകൾ തകർന്നുവീണ് വിദ്യാർഥികൾ ഉൾപ്പെടെയുള്ളവർക്ക് പരുക്കേറ്റ സംഭവവും പി. രാജീവ് ചൂണ്ടിക്കാട്ടി. തലനാരിഴയ്ക്കാണ് കുട്ടികൾ വലിയ അപകടത്തിൽനിന്ന് രക്ഷപ്പെട്ടതെന്നാണ് വാർത്തകളെന്ന് അദ്ദേഹം പറഞ്ഞു. സംഭവത്തെ തുടർന്ന് നീന്തൽ മത്സരങ്ങൾ മാറ്റിവയ്ക്കേണ്ടിവന്നതായും അദ്ദേഹം ചൂണ്ടിക്കാട്ടി.

കായികമേളയ്ക്കിടെ കുടിവെള്ളം ലഭിക്കാത്തത്, മലിനജലം കുടിക്കേണ്ടിവന്നത്, ഭക്ഷണത്തിന്റെയും താമസസൗകര്യങ്ങളുടെയും അപര്യാപ്തത തുടങ്ങിയ പരാതികൾ ഉയർന്നതായും പി. രാജീവ് പറഞ്ഞു. മത്സരങ്ങൾ മാറ്റിവച്ച വിവരം പങ്കെടുക്കുന്നവരെ യഥാസമയം അറിയിക്കുന്നതിലും വീഴ്ചയുണ്ടായെന്ന് അദ്ദേഹം ആരോപിച്ചു.

മേളയുടെ നടത്തിപ്പിൽ ഗുരുതരമായ സുരക്ഷാവീഴ്ചയുണ്ടായെന്നും ആവശ്യമായ മുന്നൊരുക്കങ്ങളില്ലാതെയാണ് പരിപാടി സംഘടിപ്പിച്ചതെന്നും ഇന്റലിജൻസ് റിപ്പോർട്ട് ചെയ്തതായി മാധ്യമങ്ങൾ റിപ്പോർട്ട് ചെയ്തിട്ടുണ്ടെന്നും പി. രാജീവ് പറഞ്ഞു.

തൃശൂർ ജില്ലയുടെ ചുമതലയുള്ള കായികമന്ത്രിയുടെ പ്രതികരണം തന്നെ അദ്ദേഹത്തിന്റെ പിടിപ്പുകേടും നിരുത്തരവാദിത്തവും വ്യക്തമാക്കുന്നതാണെന്നും അദ്ദേഹം വിമർശിച്ചു. പ്രധാന ചുമതല വഹിക്കുന്ന പൊതുവിദ്യാഭ്യാസ മന്ത്രിക്കും ഗുരുതരമായ വീഴ്ച സംഭവിച്ചിട്ടുണ്ടെന്ന് പി. രാജീവ് ആരോപിച്ചു.

മുൻ സർക്കാരിന്റെ കാലത്ത് കായികവകുപ്പിനെ ഒപ്പം നിർത്തിയും പ്രതിപക്ഷ എംഎൽഎമാരെ ഉൾപ്പെടെ വിശ്വാസത്തിലെടുത്തും വിദ്യാഭ്യാസവകുപ്പ് മന്ത്രിയുടെ നേതൃത്വത്തിൽ കായികമേള സംഘടിപ്പിച്ച രീതിയിൽനിന്ന് പാഠം ഉൾക്കൊണ്ടിരുന്നെങ്കിൽ നിലവിലെ സാഹചര്യം ഒഴിവാക്കാമായിരുന്നുവെന്നും അദ്ദേഹം പറഞ്ഞു.

നേരത്തെ നിശ്ചയിച്ചിരുന്ന വേദി മാറ്റി തൃശൂരിൽ കായികമേള നടത്താൻ തീരുമാനിച്ചതുമുതൽ വിവാദങ്ങൾ ആരംഭിച്ചിരുന്നുവെന്നും പി. രാജീവ് ചൂണ്ടിക്കാട്ടി. സ്കൂൾ കായികമേള താറുമാറായ സംഭവത്തിൽ സമഗ്രമായ അന്വേഷണം അടിയന്തരമായി നടത്താൻ സർക്കാർ തയ്യാറാകണമെന്നും അദ്ദേഹം ആവശ്യപ്പെട്ടു.