കേരളത്തില്‍ വീണ്ടും കൊറോണ വൈറസ് സ്ഥിരീകരിച്ചിരിക്കുന്നു. പത്തനംതിട്ടയില്‍ അഞ്ച് പേര്‍ക്കാണ് പുതിയതായി കൊവിഡ്- 19 സ്ഥിരീകരിച്ചത്. ഇറ്റലിയില്‍ നിന്നെത്തിയ മൂന്ന് പേര്‍ക്കും ഇവരുമായി ബന്ധപ്പെട്ട രണ്ടു ബന്ധുക്കള്‍ക്കുമാണ് രോഗം സ്ഥിരീകരിച്ചത്. ആരോഗ്യമന്ത്രി കെ കെ ശൈലജ വാര്‍ത്താസമ്മേളനത്തിലൂടെയാണ് ഇക്കാര്യം അറിയിച്ചത്. അതേസമയം, കേരളത്തില്‍ കൊറോണവൈറസ് സ്ഥിരീകരിച്ചിരിക്കുന്ന പശ്ചാത്തലത്തില്‍ തലസ്ഥാനനഗരിയില്‍ നാളെ നടത്താന്‍ തീരുമാനിച്ചിരുന്ന ആറ്റുകാല്‍ പൊങ്കാലയില്‍ മാറ്റമുണ്ടാകില്ല. കര്‍ശന സുരക്ഷ ഏര്‍പ്പെടുത്താനാണ് സംസ്ഥാന ആരോഗ്യമന്ത്രാലയം തീരുമാനിച്ചിരിക്കുന്നത്. എന്നാല്‍, ആറ്റുകാല്‍ പൊങ്കാലയ്ക്ക് കൊവിഡ്- 19 ഭീഷണിയാകുമോ എന്നാണ് ഇപ്പോള്‍ ഉയരുന്ന ആശങ്ക. ലക്ഷകണക്കിന് ആളുകള്‍ പങ്കെടുക്കുന്ന ആറ്റുകാല്‍ പൊങ്കാലയ്ക്ക് കര്‍ശന നിര്‍ദേശങ്ങളാണ് ആരോഗ്യമന്ത്രാലയം പുറപ്പെടുവിച്ചിരിക്കുന്നത്.

​ചുമ, പനി എന്നിവ ഉള്ളവര്‍ പൊങ്കാലയില്‍ പങ്കെടുക്കരുത്'

ആറ്റുകാല്‍ പൊങ്കാലയുടെ അവസാനഘട്ട ഒരുക്കത്തിലാണ് തലസ്ഥാനനഗരി. സംസ്ഥാനത്ത് രണ്ടാമതും കൊറോണവൈറസ് സ്ഥിരീകരിച്ച സാഹചര്യത്തില്‍ ആറ്റുകാല്‍ പൊങ്കാലയ്ക്ക് കര്‍ശന സുരക്ഷയാണ് ഏര്‍പ്പെടുത്തിയിരിക്കുന്നത്. 'രോഗ ലക്ഷണമുള്ളവര്‍ പൊങ്കാലയ്ക്ക് വരരുത്. രോഗബാധിത മേഖലയില്‍ നിന്നുള്ളവര്‍ പൊങ്കാലയില്‍ പങ്കെടുക്കരുത്. ശ്വാസതടസ്സവും ചുമയും പനിയും ഉള്ളവര്‍ പൊങ്കാലയില്‍ ഒഴിവാക്കണം', എന്നീ നിര്‍ദേശങ്ങളാണ് ആരോഗ്യമന്ത്രി അറിയിച്ചിരിക്കുന്നത്.

12 ആംബുലന്‍സ്, അഞ്ച് ബൈക്ക് ആംബുലന്‍സ് എന്നിവ സജ്ജം

നാളെ ആറുകാല്‍ പൊങ്കാല നടക്കുന്ന സാഹചര്യത്തില്‍ 12 ആംബുലന്‍സുകളും അഞ്ച് ബൈക്ക് ആംബുലന്‍സുകളും സജ്ജമാക്കിയിട്ടുണ്ട്. ഡോക്ടര്‍മാരും പാരാമെഡിക്കല്‍ ജീവനക്കാരുമുള്‍പ്പെടുന്ന 23 സംഘങ്ങളെ നിരീക്ഷണത്തിനായി നിയോഗിച്ചിട്ടുണ്ട്. ഇവരെ നിശ്ചയിച്ചിട്ടുള്ള സ്ഥലങ്ങളില്‍ വിന്യസിക്കും. പൊങ്കാല നടക്കുന്ന 32 വാര്‍ഡുകളില്‍ പ്രദേശവാസികളെ ഉള്‍പ്പെടുത്തി പ്രത്യേക സംഘങ്ങള്‍ വീടു കയറി പരിശോധിക്കും. തങ്ങള്‍ക്ക് നിര്‍ദ്ദേശിച്ചിട്ടുള്ള സ്ഥലങ്ങളില്‍ ചെന്ന് ആര്‍ക്കെങ്കിലും പനി, ജലദോഷം, ചുമ, ശ്വാസതടസ്സം, വിദേശത്തുനിന്ന് വന്നവര്‍ എന്നിങ്ങനെയുള്ളവരെ കണ്ടെത്താനുള്ള ശ്രമം നടത്തും.

​പൊങ്കാല ഇടുന്നവരുടെ വീഡിയോ ചിത്രീകരിക്കും

നാളെ തലസ്ഥാനനഗരിയില്‍ ആറ്റുകാല്‍ പൊങ്കാല നടക്കുന്ന സമയങ്ങളില്‍ വീഡിയോ ചിത്രീകരണം ഉണ്ടാകും. ഭാവിയില്‍ ആര്‍ക്കെങ്കിലും രോഗലക്ഷണങ്ങള്‍ പിന്നീട് വന്നാല്‍ ഇവരുമായി ഇടപഴകിയവരെ കണ്ടെത്തുന്നതിന് വേണ്ടിയാണ് ഇത്തരത്തില്‍ വീഡിയോ ചിത്രീകരിക്കുന്നത്. റെയില്‍വെ സ്‌റ്റേഷന്‍, ബസ് സ്റ്റാന്‍ഡുകള്‍, സമീപ ക്ഷേത്രങ്ങള്‍, ആറ്റുകാല്‍ ക്ഷേത്രം എന്നിവിടങ്ങളില്‍ വിവിധ ഭാഷകളില്‍ ബോധവത്കരണത്തിനായി അറിയിപ്പുകള്‍ നല്‍കും.

​രോഗലക്ഷണമുള്ളവര്‍ വീട്ടില്‍ തന്നെ പൊങ്കാല ഇടണം

രോഗലക്ഷണം ഉള്ളവര്‍ പൊങ്കാലയിടാന്‍ എത്താതെ വീട്ടില്‍ വെച്ച് തന്നെ പൊങ്കാല ഇടാന്‍ ശ്രമിക്കണമെന്ന് കളക്ടര്‍ പറഞ്ഞു. മാത്രമല്ല, വിദേശത്തുനിന്ന് എത്തിയവര്‍ താമസിക്കുന്ന ഹോട്ടലുകളില്‍ തന്നെ അവര്‍ക്കായി പൊങ്കാല ഇടാന്‍ സൗകര്യം ഒരുക്കണമെന്നാണ് നിര്‍ദേശം നല്‍കിയിരിക്കുന്നത്. ആറ്റുകാല്‍ ക്ഷേത്രത്തില്‍ നിശ്ചിത ഇടവേളകളില്‍ അറിയിപ്പുകള്‍ നല്‍കും. മാത്രമല്ല, ക്യൂ നിയന്ത്രിക്കുന്നതിനായി തയ്യാറാക്കിയിട്ടുള്ള ബാരിക്കേഡുകളില്‍ നിശ്ചിത ഇടവേളകളില്‍ അണുനാശിനികള്‍ പ്രയോഗിക്കും. ആശയവിനിമയത്തിന് തകരാറുകള്‍ ഉണ്ടായാല്‍ ഉപയോഗിക്കാന്‍ എല്ലാ ആംബുലന്‍സുകളിലും ഹാം റേഡിയോ ഉപയോഗിക്കാമെന്നും കളക്ടര്‍ പറഞ്ഞു.

​ഒരോ വര്‍ഷവും ലക്ഷക്കണക്കിന് സ്ത്രീകള്‍ പങ്കെടുക്കുന്ന ആറ്റുകാല്‍ പൊങ്കാല

ആറ്റുകാല്‍ പൊങ്കാലയ്ക്ക് പങ്കെടുക്കാന്‍ എത്തുന്ന സ്ത്രീകള്‍ക്ക് വലിയ മുന്‍കരുതലുകളാണ് ആരോഗ്യമന്ത്രി നിര്‍ദേശിച്ചിരിക്കുന്നത്. ലോകത്തില്‍ തന്നെ ഏറ്റവും അധികം സ്ത്രീകള്‍ പങ്കെടുക്കുന്ന ഉത്സവം എന്ന ഗിന്നസ് ലോക റെക്കോര്‍ഡ് ആറ്റുകാല്‍ പൊങ്കാലയ്ക്ക് അവകാശപ്പെട്ടതാണ്. സ്ത്രീകളുടെ ശബരിമല എന്നാണ് ആറ്റുകാല്‍ ക്ഷേത്രം അറിയപ്പെടുന്നത്. പൊങ്കാലയിടാനായി ഓരോ വര്‍ഷവും ലക്ഷക്കണക്കിന് സ്ത്രീകളാണ് എത്താറുള്ളത്.