സംസ്ഥാനത്ത് ബുധനാഴ്‌ച പുതിയ കൊറോണ വൈറസ് കേസുകൾ സ്ഥിരീകരിക്കപ്പെട്ടിട്ടില്ലെന്ന് മുഖ്യമന്ത്രി പിണാറായി വിജയൻ. വിവിധ ഭാഗങ്ങളിലായി 25603 പേർ നിരീക്ഷണത്തിലുണ്ട്. 25363 വീടുകളിലും 237 പേർ ആശുപത്രികളിലും നിരീക്ഷണത്തിലാണ്. പുതുതായി ഇന്ന് 7861 പേരെ നിരീക്ഷണത്തിൽ ഉൾപ്പെടുത്തി. 4622 പേരെ നിരീക്ഷണത്തിൽ നിന്ന് ഒഴിവാക്കിയെന്നും അദ്ദേഹം പറഞ്ഞു.

7861 പേരാണു പുതിയതായി നിരീക്ഷണത്തിലുള്ളത്. 4,622 പേരിൽ രോഗബാധയില്ലെന്നു വ്യക്തമായി. പുതിയതായി 2,550 സാംപിളുകൾ പരിശോധനയ്ക്കയച്ചു. അതിൽ 2,140 സാംപിളുകൾ നെഗറ്റീവാണെന്നും മുഖ്യമന്ത്രി പത്രസമ്മേളനത്തിൽ പറഞ്ഞു. വൈറസ് വ്യാപിക്കാനുള്ള സാഹചര്യം നിലവിലുണ്ടെന്നും അദ്ദേഹം കൂട്ടിച്ചേർത്തു.

വൈറസ് വ്യാപിക്കാനുള്ള സാഹചര്യം ഗൗരവത്തോടെ കാണണം. പഴുതടച്ച പ്രവർത്തനമാണ് ഇപ്പോൾ ആവശ്യം. സർക്കാരിൻ്റെ ഭാഗത്ത് നിന്നും അതിനായുള്ള എല്ലാവിധ നടപടികളും തുടർന്നും ഉണ്ടാകും. സുപ്രീംകോടതിയും ഹൈക്കോടതിയും കേരളത്തിന്റെ പ്രതിരോധപ്രവര്‍ത്തനങ്ങളെ അഭിനന്ദിച്ചത് നമ്മുടെ പ്രവർത്തനങ്ങൾക്ക് കരുത്ത് പകരുന്നതാണ്.

ചികിത്സാ സൗകര്യങ്ങൾ വിപുലമാക്കുന്നതിനായി പ്രാഥമിക ആരോഗ്യ കേന്ദ്രങ്ങളിൽ ഒപി സമയം നീട്ടിയിട്ടുണ്ട്. പ്രാദേശികമായി ഡോക്‌ടർമാരെ നിയമിക്കും. റിട്ടയർ ചെയ്‌ത ഡോക്ടർമാരുടെയും ആരോഗ്യമേഖലയിൽ പ്രവർത്തിച്ച ജീവനക്കാരുടേയും പട്ടിക ജില്ലാ ഭരണകൂടം തയാറാക്കും. ആരാധനാലയങ്ങളിൽ ആളുകൾ ഒത്തുകൂടുന്നത് ഒഴിവാക്കാനുള്ള നിർദേശങ്ങൾ ഉണ്ടാകണമെന്നും പത്രസമ്മേളനത്തിൽ മുഖ്യമന്ത്രി പറഞ്ഞു.

കൊറോണ ഭീഷണിയിൽ നിരീക്ഷണത്തിൽ കഴിയുന്നവർ ഇറങ്ങിപോകുന്ന അവസ്ഥ ഉണ്ടാകരുത്. വീടുകളിൽ നിരീക്ഷണത്തിൽ കഴിയുന്നവരും അധികൃതർ നൽകുന്ന നിർദേശങ്ങൾ പാലിക്കണം. ഒപ്പം കടകളിലും വാണിജ്യ സ്ഥാപനങ്ങളിലും സുരക്ഷ ഉറപ്പാക്കണമെന്നും മുഖ്യമന്ത്രി വ്യക്തമാക്കി.