അവശ്യ സര്‍വീസുകള്‍ക്കും ചരക്കുനീക്കത്തിനും ചികിത്സാ സേവനത്തിനും ദേശീയപാത അടയ്ക്കുന്ന സാഹചര്യം ഉണ്ടാകരുതെന്ന് ഹൈക്കോടതി.
അഡ്മിൻ
കാസര്‍കോട്ടെ അതിര്‍ത്തി മണ്ണിട്ട് അടച്ച കര്‍ണാടകയുടെ നടപടിയ്‌ക്കെതിരെ കേരള ഹൈക്കോടതി. മഹാമാരിയെ ചെറുക്കുന്നതിന്റെ പേരില്‍ മനുഷ്യജീവനുകള്‍ പൊലിയാന്‍ പാടില്ലെന്ന് ഹൈക്കോടതി. ലോക്ക് ഡൗണില്‍ കേരള- കര്‍ണാടക അതിര്‍ത്തി അടച്ച വിഷയം ഹൈക്കോടതി ഫുള്‍ ബെഞ്ച് പരിഗണിക്കവെയാണ് ഈ പരാമര്‍ശമുണ്ടായത്.
ഇപ്പോഴത്തെ അവസ്ഥയില്‍ കേന്ദ്ര സര്‍ക്കാരും കര്‍ണാടക സര്‍ക്കാരും അവസരത്തിനൊത്ത് ഉയരണമെന്നും ഹൈക്കോടതി പറഞ്ഞു. നിലവില്‍ പ്രശ്‌നം രമ്യമായി പരിഹരിക്കണം. അതിര്‍ത്തി അടയ്ക്കാന്‍ കര്‍ണാടകയ്ക്ക് അധികാരമില്ലെന്ന് സംസ്ഥാന സര്‍ക്കാര്‍ കോടതിയില്‍ നിലപാട് സ്വീകരിച്ചു. ചൊവ്വാഴ്ച രാവിലെ പതിനൊന്നു മണിയ്ക്ക് കര്‍ണാടകയുടെ അഡ്വക്കേറ്റ് ജനറലിനെ വീഡിയോ കോണ്‍ഫറന്‍സ് വഴി ഹൈക്കോടതി കേള്‍ക്കും.
അവശ്യ സര്‍വീസുകള്‍ക്കും ചരക്കുനീക്കത്തിനും ചികിത്സാ സേവനത്തിനും ദേശീയപാത അടയ്ക്കുന്ന സാഹചര്യം ഉണ്ടാകരുതെന്ന് ഹൈക്കോടതി പറഞ്ഞു. ചരക്കു നീക്കത്തിന് മുന്തിയ പരിഗണന നല്‍കാന്‍ നിര്‍ദേശിച്ചിട്ടുണ്ടെന്നും കേന്ദ്ര സര്‍ക്കാര്‍ വ്യക്തമാക്കി. അതേസമയം, കേസില്‍ നിലപാട് വ്യക്തമാക്കാന്‍ കര്‍ണാടക സര്‍ക്കാര്‍ ഹൈക്കോടതിയില്‍ ഒരു ദിവസത്തെ സാവകാശം തേടിയിട്ടുണ്ട്.
