കണ്ടെയ്ൻമെന്റ് സോണുകളിലൊഴികെ റോഡുകൾ അടച്ചിടുന്നില്ലെന്ന് മുഖ്യമന്ത്രി പിണറായി വിജയൻ. ഓട്ടോമൊബൈൽ വർക്ക്ഷോപ്പുകൾ, വാഹന ഷോറൂമുകൾ എന്നിവയ്ക്ക് കണ്ടയ്ൻമെന്റ് സോണിൽ ഒഴികെയുള്ള പ്രദേശങ്ങളിൽ പ്രവർത്തിക്കാൻ അനുമതി നൽകും. എല്ലാ സുരക്ഷാ ക്രമീകരണങ്ങളും പാലിച്ചുകൊണ്ടുവേണം ഇവ പ്രവർത്തിക്കാൻ. നിബന്ധനകൾക്ക് വിധേയമായി ഇവിടങ്ങളിൽ വാഹന ഗതാഗതം അനുവദിക്കുമെന്നും മുഖ്യമന്ത്രി വ്യക്തമാക്കി.

സർക്കാർ അനുവദിച്ച കടകൾ തുറക്കാൻ തദ്ദേശ സ്വയംഭരണ സ്ഥാപനങ്ങളുടെ പ്രത്യേക അനുമതി ആവശ്യമില്ല. ഞായറാഴ്ച കടകൾക്കും മറ്റും ഒഴിവ് പ്രഖ്യാപിച്ചിട്ടുണ്ടെങ്കിലും ഭക്ഷണം പാഴ്സൽ നൽകുന്ന റസ്റ്റോറന്റുകൾക്കും മറ്റു സ്ഥാപനങ്ങൾക്കും ഉച്ചയ്ക്കു ശേഷം സാധാരണ പോലെ പ്രവർത്തിക്കാമെന്നും മുഖ്യമന്ത്രി പറഞ്ഞു.