തിരുവനന്തപുരം കോർപറേഷൻ കൗൺസിലറെ സസ്പെൻഡ് ചെയ്തു. കോർപറേഷൻ കൗൺസിൽ യോഗത്തിനിടെ ഡെപ്യൂട്ടി മേയറെ കയ്യേറ്റം ചെയ്യാൻ ശ്രമിച്ചതിനാണ് സസ്പെൻഡ് ചെയ്തതെന്ന് മേയർ ആര്യ രാജേന്ദ്രൻ അറിയിച്ചു.

ബിജെപി കൗൺസിലർ ഗിരികുമാറിനെയാണ് മേയർ സസ്പെന്റ് ചെയ്തത്. കോർപറേഷൻ സോണൽ ഓഫിസുമായി ബന്ധപ്പെട്ട അഴിമതി ആരോപണം ചർച്ച ചെയ്യണമെന്ന് ബിജെപി യോഗത്തിൽ ആവശ്യപ്പെട്ടതാണ് പ്രശ്നങ്ങളുടെ തുടക്കം. അജണ്ടയിലില്ലാത്ത വിഷയമാണ് അത് എന്ന് ഭരണകക്ഷി നിലപാട് എടുത്തതോടെ വാക്കുതർക്കം തുടങ്ങി.

പിന്നീടത് സംഘർഷത്തിൽ കലാശിക്കുകയായിരുന്നു. സോണൽ ഓഫിസ് അഴിമതിയിൽ ആവശ്യമായ എല്ലാ നടപടികളും നഗരസഭ എടുത്തിട്ടുണ്ടെന്ന് മേയർ ആര്യ രാജേന്ദ്രൻ പറഞ്ഞു. മുഴുവൻ സോണൽ ഓഫിസുകളിലും പരിശോധന നടത്തുന്നുണ്ട്. ഡെപ്യൂട്ടി മേയറെ കയ്യേറ്റം ചെയ്തതിൽ അദ്ദേഹം പോലിസിന് പരാതി നൽകും. ബിജെപി അംഗങ്ങൾ ഡെപ്യൂട്ടി മേയറുടെ അമ്മയെ പോലും മോശമായി പറഞ്ഞ് അവഹേളിച്ചു എന്നും മേയർ പറഞ്ഞു.