ഇന്ധനവിലവര്‍ധനവിനെതിരായ കോണ്‍ഗ്രസിന്റെ വഴിതടയല്‍ സമരത്തിനിടെ നടന്‍ ജോജു ജോര്‍ജിന്റെ കാറിന്റെ ചില്ല് തകര്‍ത്ത സംഭവത്തില്‍ കോണ്‍ഗ്രസ് പ്രവര്‍ത്തകന്‍ കസ്റ്റഡിയില്‍. എറണാകുളം വൈറ്റില സ്വദേശി പി.ജി ജോസഫാണ് കസ്റ്റഡിയിലായത്. ഇയാളെ പൊലീസ് ചോദ്യം ചെയ്യുകയാണ്.

ജോജുവിന്റെ വാഹനത്തിന്റെ പിന്‍ഭാഗത്തെ ചില്ലായിരുന്നു അടിച്ചുതകര്‍ത്തത്. ഇതിനിടെ ജോസഫിന്റെ കൈ മുറിഞ്ഞിരുന്നു. എന്നാല്‍ ആശുപത്രിയില്‍ പോകാതെ മറ്റൊരു രഹസ്യകേന്ദ്രത്തിലേക്കാണ് ഇയാള്‍ പോയത്.

സംഭവത്തിന്റെ ദൃശ്യങ്ങള്‍ അടക്കം പൊലീസ് പരിശോധിച്ചിരുന്നു. ഇതില്‍ നിന്നാണ് ഇയാളെ കുറിച്ചുള്ള സൂചനകള്‍ ലഭിച്ചത്. രക്തസാംപിള്‍ അടക്കെ പൊലീസ് ശേഖരിച്ചിരുന്നു. എഫ്.ഐ.ആര്‍ പ്രകാരം ആറ് ലക്ഷം രൂപയുടെ നഷ്ടമാണ് കാറിനുണ്ടായിരിക്കുന്നത്.