താൻ നായകനായ ജയ് ഭീം സിനിമയ്ക്ക് അഭിനന്ദനമറിയിച്ച മന്ത്രി പിഎ മുഹമ്മദ് റിയാസിന് നന്ദിയറിയിച്ച് സൂപ്പര്‍സ്റ്റാര്‍ സൂര്യ. ജയ് ഭീം കണ്ടതിനു ശേഷം മന്ത്രി പിഎ മുഹമ്മദ് റിയാസ് ചെയ്ത ട്വീറ്റ് ഷെയര്‍ ചെയ്താണ് അഭിനന്ദനത്തിന് സൂര്യ നന്ദി അറിയിച്ചിരിക്കുന്നത്.

ശക്തമായ അവതരണം, കൃത്യമായ രാഷ്ട്രീയ പ്രസ്താവന, അഭിനന്ദനങ്ങള്‍ എന്നായിരുന്നു മന്ത്രിയുടെ ട്വീറ്റ്. ഫേസ്ബുക്കിലും സിനിമയെ അഭിനന്ദിച്ച് മന്ത്രി പോസ്റ്റ് ചെയ്തിരുന്നു. മദ്രാസ് ഹൈക്കോടതി റിട്ട. ജസ്റ്റിസ് കെ.ചന്ദ്രുവിന്റെ ജീവിതത്തെ ആസ്പദമാക്കി ടി ജെ ജ്ഞാനവേല്‍ ഒരുക്കിയ ചിത്രമാണ് ‘ജയ് ഭീം’.

1990ലെ രാജകണ്ണു കസ്റ്റഡി മരണമാണ് കഥാതന്തു. സൂര്യ നായകനായ ചിത്രം ആമസോണ്‍ പ്രൈമിലൂടെയാണ് റിലീസ് ചെയ്തത്. ചിത്രം വന്‍ പ്രേക്ഷക ശ്രദ്ധ ആകര്‍ഷിക്കുകയും വലിയ ചര്‍ച്ചകള്‍ക്ക് വഴിവെക്കുകയും ചെയ്യുകയാണ്.