അടുത്തിടെ അന്തരിച്ച മുതിര്‍ന്ന കോണ്‍ഗ്രസ് നേതാവ് രാജീവ് സാത്തവിന്റെ ഭാര്യ ഡോ. പ്രജ്ഞ സാത്തവ് മഹാരാഷ്ട്ര നിയമസഭാ കൗണ്‍സിലിലേക്ക് എതിരില്ലാതെ തെരഞ്ഞെടുക്കപ്പെട്ടു. രാജ്യസഭാംഗവും ഗുജറാത്തിന്റെ ചുമതലയും വഹിച്ചിരുന്ന എഐസിസി പ്രതിനിധിയുമായിരുന്ന രാജീവ് സാത്തവ് മേയിലാണ് കൊവിഡിനെ തുടര്‍ന്ന് മരിച്ചത്.

യൂത്ത് കോണ്‍ഗ്രസ് ദേശീയ അധ്യക്ഷനായിരുന്നു രാജീവ് സാത്തവ്. ബിജെപി സ്ഥാനാര്‍ത്ഥി സജ്ഞയ് ഖേദ്ക്കര്‍ നാമനിര്‍ദേശ പത്രിക പിന്‍വലിച്ചതോടെ പ്രജ്ഞാ സാത്തവ് കൗണ്‍സിലിലേക്ക് എതിരില്ലാതെ തെരഞ്ഞെടുക്കപ്പെടുകയായിരുന്നു. കോണ്‍ഗ്രസ് നേതാക്കളുടെ അഭ്യര്‍ഥന മാനിച്ച് ബിജെപി സ്ഥാനാര്‍ത്ഥി പത്രിക പിന്‍വലിക്കുകയായിരുന്നുവെന്നാണ് വിവരം.

തെരഞ്ഞെടുപ്പിൽ പത്രിക പിന്‍വലിക്കണമെന്നാവശ്യപ്പെട്ട് കോണ്‍ഗ്രസ് നേതാക്കള്‍ ബിജെപി നേതാവ് ദേവേന്ദ്ര ഫഡ്‌നാവിസുമായി കൂടികാഴ്ച്ച നടത്തിയിരുന്നു.