ഹലാല്‍ വിവാദത്തില്‍ പ്രതികരണവുമായി സംസ്ഥാന മുഖ്യമന്ത്രി പിണറായി വിജയന്‍. ഹലാല്‍ എന്നാല്‍ കഴിക്കാന്‍ സാധിക്കുന്നത് എന്ന അര്‍ത്ഥമാണ് ഉള്ളത്. എന്നാല്‍ അത് മറ്റൊരു അര്‍ത്ഥത്തില്‍ പ്രചരിപ്പിച്ച് വിവാദമുണ്ടാക്കുന്നത് സംഘ്പരിവാര്‍ അജണ്ടയാണെന്നും മുഖ്യമന്ത്രി പറഞ്ഞു. ഇന്ന് സിപിഎം പിണറായി ഏരിയ കമ്മിറ്റി യോഗം ഉദ്​ഘാടനം ചെയ്​തുകൊണ്ട്​ സംസാരിക്കുകയായിരുന്നു മുഖ്യമന്ത്രി.

മുഖ്യമന്ത്രിയുടെ വാക്കുകൾ: 'ഹലാല്‍ എന്നാല്‍ കഴിക്കാന്‍ പറ്റുന്നതാണ്. അതുകൊണ്ട് വേറെ ദോഷമില്ല എന്നതാണ് ഉദ്ദേശിക്കുന്നത്. അത്തരമൊരു അര്‍ത്ഥമാണ് ആ പദത്തിനുള്ളത്. എന്നാല്‍ അതിനോടൊപ്പം ഒരു വിഭാഗത്തെ അടച്ചാക്ഷേപിക്കാനുള്ള ഒരുപാട് ആരോപണങ്ങള്‍ ഉയര്‍ന്നിട്ടുണ്ട്. അങ്ങനെയൊരു വല്ലാത്ത ചേരിതിരിവ് സൃഷ്ടിക്കാനാണ് സംഘപരിവാര്‍ ശ്രമിക്കുന്നത്. അത് രാജ്യവ്യാപകമായിട്ടുണ്ട്. കേരളത്തിലും ചില നടപടികള്‍ കാണാന്‍ സാധിക്കും.

ഹലാൽ വിവാദം ന്യൂനപക്ഷങ്ങളെ ആക്രമിക്കാൻ വേണ്ടിയാണ്​ ഉപയോഗിക്കുന്നത്​. പാർലമെന്‍റിലെ ഭക്ഷണത്തിലും ഹലാൽ മുദ്രയുണ്ട്.. വർഗീയതയെ വർഗീയത കൊണ്ട്​ നേരിടാനാകില്ല'.