കണ്ണൂര്‍ യുണിവേഴ്‌സിറ്റി വൈസ് ചാന്‍സിലറുടെ പുനര്‍നിയമനത്തില്‍ പ്രതികരണവുമായി മുന്‍ മന്ത്രി എ കെ ബാലന്‍. ഉന്നത വിദ്യാഭ്യാസ മന്ത്രി ഗവര്‍ണര്‍ക്ക് കത്തയച്ചതില്‍ തെറ്റില്ലെന്ന് എ കെ ബാലന്‍ പറഞ്ഞു. ഗവര്‍ണറെ ഉപദേശിക്കാനും സഹായിക്കാനും മന്ത്രിസഭക്ക് അവകാശമുണ്ടെന്നും അദ്ദേഹം പറഞ്ഞു.

ഗവര്‍ണറുടെ ചെവിയില്‍ പറയേണ്ടതോ എവിടെ നിന്നെങ്കിലും അശരീരിയായി കിട്ടേണ്ടതോ ആയ കാര്യമല്ല. രേഖാമൂലം നല്‍കേണ്ടതാണ്. അതുകൊണ്ടാണ് മന്ത്രി കത്തയച്ചത്. ഹൈക്കോടതി തന്നെ നിയമനത്തില്‍ തെറ്റില്ലെന്ന് പറഞ്ഞതാണെന്നും എ കെ ബാലന്‍ വ്യക്തമാക്കി. ഗവര്‍ണറുടെ വിവേചനാധികാരം ഉപയോഗിക്കാം. പക്ഷേ അത് ഭരണഘടനാപരമായിരിക്കണം. ഭരണഘടനാപരമായ കാര്യമാണ് സര്‍ക്കാര്‍ ചെയ്തതെന്നും എ കെ ബാലന്‍ കൂട്ടിച്ചേര്‍ത്തു