കെ.വി തോമസ് സിപിഎം പാർട്ടി കോൺഗ്രസിലെ സെമിനാറിലേക്ക് വരുമെന്നോ വരില്ല എന്നോ അറിയിച്ചിട്ടില്ല എന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. തീരുമാനിക്കേണ്ടത് അദ്ദേഹമാണ്. വന്നാല്‍ സ്വാഗതം ചെയ്യും. പല കാര്യത്തിലും അദ്ദേഹം നല്ല തീരുമാനം എടുത്തിട്ടുണ്ടെന്നും കോടിയേരി പറഞ്ഞു.

ബിജെപിയെ തൃപ്തിപെടുത്താനാണ് സംസ്ഥാനത്തെ കോൺഗ്രസ് നേതാക്കളെ സെമിനാറില്‍ പങ്കെടുക്കാന്‍ കെപിസിസി അനുവദിക്കാത്തത്. മഹാത്മ ഗാന്ധി വിചാരിച്ചിട്ട് പോലും കോണ്‍ഗ്രസിനെ ശരിയാക്കാന്‍ കഴിഞ്ഞിട്ടില്ല. പിന്നെയാണോ സുധാകരനെന്നും കോടിയേരി പരിഹസിച്ചു.

കോൺഗ്രസ് പാർട്ടിയിൽ ഓരോരുത്തര്‍ക്കം ഓരോ അഭിപ്രായമാണെന്ന് പറഞ്ഞ കോടിയേരി, കോണ്‍ഗ്രസില്‍ അഞ്ചാള് കൂടി ആറ് ഗ്രൂപ്പാണ്. കെ സുധാകരന്‍ ഒന്നു പറയുന്നു, ചന്ദ്രശേഖരന്‍ വേറൊന്ന് പറയുന്നു. കോണ്‍ഗ്രസിന് ഒരു കാര്യത്തിലും ഏകീകൃത അഭിപ്രായം ഇല്ല. ഇത് കോണ്‍ഗ്രസിനേറ്റ അപജയമാണെന്നും വിമര്‍ശിച്ചു.