സർവീസ് ആരംഭിച്ചതിനു പിന്നാലെ കെഎസ്ആർടിസി സ്വിഫ്റ്റ് ബസുകൾ തുടർച്ചയായി അപകടത്തിൽപ്പെടുന്നതുമായി ബന്ധപ്പെട്ടുള്ള തെറ്റായ വാർത്തകളും ഡീ ഗ്രേഡിങ്ങും സ്വിഫ്റ്റ് സർവീസിനു പ്രചാരണം ലഭിക്കാൻ സഹായിച്ചതായി കെഎസ്ആർടിസി. അപകടങ്ങൾ സംഭവിക്കുന്നത് തീർത്തും സ്വഭാവികമാണെന്നും നിങ്ങളുടെ അമിതാവേശം ഞങ്ങൾക്കു നൽകിയത് ഒരു രൂപ ചെലവില്ലാതെ ലോകോത്തര പ്രീമിയം ബ്രാന്റ് ബസ്സുകൾക്ക് ലക്ഷങ്ങൾമുടക്കി പരസ്യം നൽകിയാൽ കിട്ടുന്നതിലേറെ പ്രശസ്തിയും അതിലൂടെ സത്യസന്ധമായ വസ്തുതകൾ പൊതുജനങ്ങളെ ബോധ്യപ്പെടുത്തുന്നതിനുള്ള അവസരവുമാണെന്നു കെഎസ്ആർടിസി ഫെയ്‌സ്ബുക്ക് കുറിപ്പിലൂടെ വ്യക്തമാക്കി.

ഫെയ്‌സ്ബുക്ക് കുറിപ്പിന്റെ പൂർണരൂപം

പൊതുജനത്തിന് ആവശ്യമായതും സൗകര്യപ്രദമായതും വിശ്വാസ യോഗ്യമായതും ആയ ഏത് സൗകര്യങ്ങളും സേവനങ്ങളും 'അവർ' സ്വയം തിരഞ്ഞെടുക്കുകയാണ് പതിവ്. അതാണ് കെഎസ്ആർടിസി സ്വിഫ്റ്റിന് ലഭിച്ച സ്വീകാര്യത. കൃത്യമായ അജൻഡയോടുകൂടി തെറ്റായ വാർത്തകളും ഡീ ഗ്രേഡിങ്ങും നടത്തി സമൂഹമാധ്യമങ്ങൾ വഴി ഉൾപ്പെടെ ബുദ്ധിമുട്ടിപ്പിച്ചവരോടു (പരോക്ഷമായി സഹായിച്ചവരോട്) ഒന്നേ ഞങ്ങൾക്ക് പറയാനുള്ളൂ. നിങ്ങളുടെ അമിതാവേശം ഞങ്ങൾക്കു നൽകിയത് ഒരു രൂപ ചെലവില്ലാതെ ലോകോത്തര പ്രീമിയം ബ്രാന്റ് ബസ്സുകൾക്ക് ലക്ഷങ്ങൾമുടക്കി പരസ്യം നൽകിയാൽ കിട്ടുന്നതിലേറെ പ്രശസ്തിയും അതിലൂടെ സത്യസന്ധമായ വസ്തുതകൾ പൊതുജനങ്ങളെ ബോധ്യപ്പെടുത്തുന്നതിനുള്ള അവസരവുമാണ് എന്നത് നന്ദിയോടെ സ്മരിക്കുന്നു. വാഹനങ്ങൾക്ക് അപകടം സംഭവിക്കുക സ്വാഭാവികമാണ്. ഏറ്റവും പുതിയ വാഹനങ്ങൾക്കും പഴയ വാഹനങ്ങൾക്കും അപകടം സംഭവിക്കാം. അപകടം എങ്ങനെ സംഭവിക്കുന്നു എന്നതാണ് പ്രധാനം.

കെഎസ്ആർടിസിയോ കെ-സ്വിഫ്‌റ്റോ അപകടത്തിൽപെട്ടിട്ടുണ്ടെങ്കിൽ ഒറ്റപ്പെട്ട ചില മാധ്യമങ്ങൾക്കും സമൂഹമാധ്യമങ്ങളിലെ ഒരു വിഭാഗത്തിനും പ്രതിസ്ഥാനത്ത് കെഎസ്ആർടിസിയോ കെ - സ്വിഫ്‌റ്റോ ആകുന്നത് ബോധപൂർവമല്ലെന്നു കരുതാൻ തരമില്ല. ഈയിടെ നടന്ന ഒരു അപകടത്തിന്റെ തെറ്റായ വാർത്ത നൽകിയശേഷം പിന്നീട് സിസിടിവി ദൃശ്യം പരിശോധിച്ച് സ്വിഫ്റ്റ് ബസിന്റെ ഡ്രൈവറുടെ ഭാഗത്ത് തെറ്റ് സംഭവിച്ചിട്ടില്ല എന്ന് ബോധ്യപ്പെട്ടെങ്കിലും വാർത്ത നൽകിയവരാരും ശരിയുടെ പക്ഷം ബോധ്യപ്പെടുത്തുവാൻ ശ്രമിച്ചിട്ടില്ല. ആരോടും പരാതിയില്ല. ദയവായി ഞങ്ങൾ നിങ്ങൾക്കുവേണ്ടിയുള്ളതാണെന്നത് തിരിച്ചറിയുക. കെഎസ്ആർടിസി എന്നും ജനങ്ങൾക്ക് സ്വന്തം, ജനങ്ങളോടൊപ്പം