വിലക്കയറ്റത്തിനെതിരെ മറ്റ് ഇടതു പാർടികളുമായി ചേർന്ന് സിപിഐ എം രാജ്യവ്യാപകമായി സംഘടിത ഐക്യപ്രക്ഷോഭത്തിന്‌ നേതൃത്വം നൽകുമെന്ന് ദേശീയ ജനറൽ സെക്രട്ടറി സീതാറാം യെച്ചൂരി. ഒരു വർഷത്തിനിടെ പെട്രോളിയം ഉൽപ്പന്നങ്ങളുടെ വില രാജ്യത്ത് 70 ശതമാനം വർധിച്ചു. പച്ചക്കറികൾക്ക്‌ 20ഉം പാചകഎണ്ണയ്‌ക്ക്‌ 23ഉം ധാന്യങ്ങൾക്ക്‌ എട്ടും ശതമാനവും വിലകൂടി. ഗോതമ്പുവില കിലോയ്ക്ക്‌ 35 രൂപയായി.

പെട്രോളിയം ഉൽപ്പന്നങ്ങളുടെയും പാചകവാതകത്തിന്റെയും വിലവർധന സർവമേഖലയിലും പണപ്പെരുപ്പം വഷളാക്കി.. രാജ്യത്ത്‌ കോടിക്കണക്കിനുപേർ പട്ടിണിയിലും ദാരിദ്ര്യത്തിലുമാണ്‌. തൊഴിലില്ലായ്‌മയും രൂക്ഷമായി. പെട്രോളിയം ഉൽപ്പന്നങ്ങൾക്കുമേൽ ചുമത്തിയ സെസും അധിക തീരുവകളും കേന്ദ്രം ഉടൻ പിൻവലിക്കണമെന്നും പൊതുവിതരണശൃംഖല വഴി ഗോതമ്പുവിതരണം പുനഃസ്ഥാപിക്കണമെന്നും അദ്ദേഹം ആവശ്യപ്പെട്ടു.