സോളാര്‍ പീഡന കേസില്‍ ഹൈബി ഈഡന്‍ എംപിയെ സിബിഐ ചോദ്യം ചെയ്തു. കൊച്ചിയില്‍ വെച്ചായിരുന്നു ചോദ്യം ചെയ്യല്‍. കേസുമായി ബന്ധപ്പെട്ട് എംഎല്‍എ ഹോസ്റ്റലില്‍ സിബിഐ നേരത്തെ തെളിവെടുപ്പ് നടത്തിയിരുന്നു. എംഎല്‍എ ഹോസ്റ്റലില്‍ ഹൈബി ഈഡന്‍ താമസിച്ചിരുന്ന നിളയിലെ 34-ാം നമ്പര്‍ മുറിയില്‍ പരാതിക്കാരിയെയും കൂട്ടിയാണ് സിബിഐ പരിശോധന നടത്തിയത്.
ഈ മുറിയില്‍ വെച്ച് പീഡനത്തിന് ഇരയായെന്നായിരുന്നു പരാതി. പരാതിക്കാരിയുമായി സീന്‍ മഹസര്‍ തയ്യാറാക്കുന്നതിന്റെ ഭാഗമായാണ് പരിശോധന നടത്തിയത്. ആദ്യ ഘട്ടത്തില്‍ മറ്റ് അന്വേഷണ ഏജന്‍സികള്‍ അന്വേഷിച്ച കേസ് 2021 അവസാനമാണ് സിബിഐ ഏറ്റെടുത്തത്. നിലവില്‍ അഞ്ച് അംഗ സിബിഐ സംഘമാണ് കേസില്‍ അന്വേഷണം നടത്തുന്നത്. സംസ്ഥാന സര്‍ക്കാറാണ് കേസ് സിബിഐക്ക് വിട്ടത്.
പീഡന പരാതിയില്‍ ആറ് കേസുകളാണ് സിബിഐ അന്വേഷിക്കുന്നത്. കോണ്‍ഗ്രസ് നേതാക്കള്‍ക്കും ബിജെപി നേതാവായ അബ്ദുള്ളക്കുട്ടിക്കെതിരെയുമാണ് സിബിഐ എഫ്ഐആര്‍ രജിസ്റ്റര്‍ ചെയ്തിരിക്കുന്നത്.
