തെറി മുഴുവൻ പറയുകയും ശേഷം അതിനെ കണ്ണൂർ കൊളോക്കിയൽ എന്ന് കെ സുധാകരൻ പറയുന്നത് കണ്ണൂർകാർക്ക് തന്നെ അപമാനമെന്ന് ജോൺ ബ്രിട്ടാസ് എം പി. കോൺഗ്രസ് പാർട്ടിയെ തിരിഞ്ഞുകൊത്തുന്ന എന്ത് പറഞ്ഞാലും കണ്ണൂർ കൊളോക്കിയൽ ആണെന്ന് സുധാകരൻ പറയും. കണ്ണൂരിൽ ഇത്തരമൊരു പ്രയോഗമില്ലെന്നും മുഖ്യമന്ത്രിയെ സുധാകരൻ അധിക്ഷേപിച്ച സംഭവത്തിൽ അദ്ദേഹം പ്രതികരിച്ചു.

മലയാളത്തിലെ ഒരു ഓൺലൈൻ മാധ്യമത്തിന് നൽകിയ അഭിമുഖത്തിലാണ് ജോൺ ബ്രിട്ടാസിന്റെ പ്രതികരണം. ഉപതെരഞ്ഞെടുപ്പ് നടക്കാനിരിക്കുന്ന തൃക്കാക്കര ഇടതുമുന്നണി യുഡിഎഫിന് വിട്ടുകൊടുക്കണമെന്ന് ദയനീയമായ അഭ്യർത്ഥന വരെ സുധാകരൻ നടത്തിയെന്നും പരിഭ്രമവും അന്ധാളിപ്പും നിറഞ്ഞതാണ് സുധാകരൻ വാക്കുകളെന്നും കെപിസിസി അധ്യക്ഷനായ കെ സുധാകരൻ സമചിത്തതയോടെ സംസാരിക്കണമെന്നും അദ്ദേഹം കൂട്ടിച്ചേർത്തു.