മുക്കുപണ്ടം പണയതട്ടിപ്പില്‍ കൊടിയത്തൂര്‍ പഞ്ചായത്ത് വൈസ് പ്രസിഡന്റ്ും കോണ്‍ഗ്രസ് നേതാവുമായ ബാബു പൊലുകുന്നത്ത് പിടിയില്‍.ബെംഗ്‌ളൂരുവില്‍ വെച്ചാണ് പിടിയിലായത്. മൂന്ന് ബാങ്കുകളിലായി മുക്കുപണ്ടം പണയം വെച്ച് ലക്ഷങ്ങള്‍ തട്ടിയെന്നാണ് കേസ്. സംഭവത്തില്‍ കൊടിയത്തൂര്‍ ബാങ്ക് മാനേജറുടെ പരാതിയിലാണ് ബാബു ഉള്‍പ്പെടെ നാല് പേര്‍ക്കെതിരെ കേസ് എടുത്തിരുന്നത്.

നടപടിക്ക് പിന്നാലെ ഒളിവില്‍ കഴിയവെയാണ് ബാബുവിന്റെ അറസ്റ്റ്. അതിനിടെ മുക്കുപണ്ട തട്ടിപ്പില്‍ ആരോപണ വിധേയനായ ബാങ്ക് ശാഖയിലെ അപ്രൈസര്‍ മരണപ്പെട്ടിരുന്നു. തീവണ്ടി തട്ടി പരിക്കേറ്റ് ചികിത്സയില്‍ കഴിയുന്ന മോഹനനാണ് മരിച്ചത്. ഇക്കഴിഞ്ഞ വ്യാഴാഴ്ച്ച രാവിലെ 11 മണിയോടെ കോഴിക്കോട്ടുവെച്ച് മോഹനന്‍ തീവണ്ടിക്ക് മുന്നിലേക്ക് ചാടി ജീവനൊടുക്കാന്‍ ശ്രമിച്ചത്. പരിക്കേറ്റ് കോഴിക്കോട് മെഡിക്കല്‍ ആശുപത്രിയില്‍ ചികിത്സയിലിരിക്കെയാണ് മരണം.

പെരുമണ്ണ സഹകരണ ബാങ്കില്‍ മുക്കുപണ്ടം പണയംവെക്കുന്നതിനിടെയാണ് വിഷ്ണുവും സന്തോഷ്‌കുമാറും പിടിയിലായത്. ഇതിനുപിന്നാലെയാണ് നാലംഗസംഘം മുക്കുപണ്ടം പണയംവെച്ച് 32 ലക്ഷം രൂപയോളം തട്ടിയെടുത്തതായി കണ്ടെത്തിയത്. കൊടിയത്തൂര്‍ ഗ്രാമീണ്‍ ബാങ്ക് ശാഖയില്‍നിന്ന് 24.26 ലക്ഷം രൂപയും കാര്‍ഷിക-ഗ്രാമവികസന ബാങ്കിന്റെ അഗസ്ത്യന്‍മുഴി ശാഖയില്‍നിന്ന് 7.2 ലക്ഷം രൂപയുമാണ് മുക്കുപണ്ടം പണയപ്പെടുത്തി ഇവര്‍ കൈക്കലാക്കിയത്.