ജീവനക്കാരിയെ ആരോഗ്യമന്ത്രി വീണ ജോര്‍ജിന്റെ വ്യാജ അശ്ലീല വീഡിയോ നിര്‍മിക്കാന്‍ നിര്‍ബന്ധിപ്പിച്ചുവെന്ന കേസില്‍ ക്രൈം നന്ദകുമാര്‍ എന്നറിയപ്പെടുന്ന ടി പി നന്ദകുമാര്‍ അറസ്റ്റില്‍ . കാക്കനാട് സ്വദേശിയായ യുവതിയുടെ പരാതിയില്‍ കൊച്ചിയില്‍ നിന്നാണ് ഇയാളെ കസ്റ്റഡിയിലെടുത്തത്. വ്യാജ അശ്ലീല വീഡിയോ ഉണ്ടാക്കാന്‍ പ്രേരിപ്പിച്ചെന്നും നിരസിച്ചപ്പോള്‍ മാനസികമായി പീഡിപ്പിച്ചുവെന്നുമാണ് യുവതിയുടെ പരാതി.
എറണാകുളം എസിപിയുടെ നേതൃത്വത്തിലുള്ള സംഘമാണ് നന്ദകുമാറിനെ അറസ്റ്റ് ചെയ്തത്. പട്ടിക ജാതി-പട്ടിക വര്‍ഗ പീഡന നിരോധന നിയമപ്രകാരം ജാമ്യമില്ലാ വകുപ്പ് ചുമത്തിയാണ് നടപടി. ഇയാള്‍ക്കെതിരെ ഐപിസി 506, 509 വകുപ്പുകളും ചുമത്തി. പിന്നാലെ നന്ദകുമാറിന്റെ കൊച്ചിയിലെ ഓഫീസില്‍ പൊലീസ് പരിശോധന നടത്തി.
മറ്റുള്ളവരുടെ മുമ്പില്‍ വെച്ച് അപമര്യാദയായി പെരുമാറുന്നു, മോശം കാര്യങ്ങള്‍ പ്രചരിപ്പിക്കുന്നു തുടങ്ങിയ പരാതികളും മെയ് 27ന് യുവതി നല്‍കിയ പരാതിയില്‍ പറയുന്നു. ഏപ്രില്‍ മാസമാണ് അശ്ലീല വീഡിയോ നിര്‍മിക്കാന്‍ ആവശ്യപ്പെട്ടതെന്നും യുവതി പരാതിപ്പെടുന്നു. കഴിഞ്ഞ വര്‍ഷവും മന്ത്രി വീണാ ജോര്‍ജിനെതിരെ അപകീര്‍ത്തികരമായ പരാമര്‍ശം നടത്തിയതിന് നന്ദകുമാറിനെ അറസ്റ്റ് ചെയ്തിരുന്നു. ഫോണിലൂടെയായിരുന്നു മന്ത്രിക്കെതിരെ പരാമര്‍ശം നടത്തിയത്. ഈ ശബ്ദരേഖ സോഷ്യല്‍ മീഡിയയില്‍ പ്രചരിപ്പിക്കുകയും ചെയ്തിരുന്നു.
