കോൺഗ്രസിന്റെ മാധ്യമ സ്ഥാപനമായ 'ജയ് ഹിന്ദ്' ടിവിയുടെ കാർ മോഷണം പോയതായി പോലീസിൽ പരാതി. മലപ്പുറം ബ്യൂറോ ഉപയോഗിച്ചിരുന്ന ആൾട്ടോ 800 വാഹനമാണ് നിലമ്പൂരിൽ വെച്ച് മോഷണം പോയത്. ബ്യൂറോ ചീഫ് അജയകുമാർ നിലമ്പൂർ പൊലീസ് സ്റ്റേഷനിൽ പരാതി നൽകി.

വയനാട് എംപി രാഹുൽ ഗാന്ധിയുടെ നിലമ്പൂർ അമൽ കോളേജിലെ പരിപാടി റിപ്പോർട്ട് ചെയ്യാനെത്തിയപ്പോഴായിരുന്നു സംഭവം. മിനർവ്വാ ജംഗ്ഷനിൽ ഹോട്ടലിന് മുന്നിൽ വണ്ടി പാർക്ക് ചെയ്ത ശേഷം ഭക്ഷണം കഴിച്ചിറങ്ങിയപ്പോഴാണ് കാർ മോഷണം പോയ വിവരം മാധ്യമപ്രവർത്തകർ അറിയുന്നത്. കെഎൽ 10 എവി 2916 നമ്പറുള്ള കറുത്ത ഓൾട്ടോ 800 കാർ ശ്രദ്ധയിൽ പെട്ടാൽ പൊലീസിനെയോ തങ്ങളെയോ വിവരം അറിയിക്കണമെന്ന് ജയ് ഹിന്ദ് ടിവി മാധ്യമപ്രവർത്തകർ അഭ്യർത്ഥിച്ചു.

കരാർ അടിസ്ഥാനത്തിൽ വാടകയ്ക്ക് എടുത്തിരിക്കുന്ന കാർ ജയ് ഹിന്ദ് ടിവിയുടെ ഉടമസ്ഥതയിലുള്ളതല്ല. കാറിനുള്ളിലുണ്ടായിരുന്ന ക്യാമറയ്ക്കും ലൈവ് വ്യൂ ഡിവൈസിനും ലക്ഷങ്ങൾ വിലയുണ്ട്.