കേന്ദ്ര സര്‍ക്കാരിനെതിരെ ആഞ്ഞടിച്ച് ഡല്‍ഹി മുഖ്യമന്ത്രി അരവിന്ദ് കെജ്രിവാള്‍. ഉപമുഖ്യമന്ത്രി മനീഷ് സിസോദിയക്കെതിരെ കേന്ദ്രം കള്ളക്കേസ് ഉണ്ടാക്കുകയാണ്. ആം ആദ്മി പാര്‍ട്ടിക്ക് ജയിലിനെ ഭയമില്ല. അവര്‍ക്ക് ജയിലിനെ പേടിയുണ്ടാകും. ബ്രിട്ടീഷുകാരോട് മാപ്പ് പറഞ്ഞ വീര്‍ സവര്‍ക്കറിനെയല്ല ഞങ്ങള്‍ പിന്തുടരുന്നത്. രാജ്യത്തിന് വേണ്ടി ജീവന്‍ ബലികൊടുത്ത ഭഗത് സിങ്ങിന്റെ പുത്രന്മാരാണെന്നും കെജ്രിവാള്‍ പറഞ്ഞു.

കെജ്രിവാള്‍ സര്‍ക്കാരിന്റെ 2021-22ലെ എക്സൈസ് നയത്തില്‍ സിബിഐ അന്വേഷണത്തിന് ലഫ്റ്റണന്റ് ഗവര്‍ണര്‍ വി കെ സക്സേന ശുപാര്‍ശ ചെയ്തതിന് പിന്നാലെയാണ് അദ്ദേഹത്തിന്റെ പ്രതികരണം. മദ്യനയത്തില്‍ നിലവിലെ ചട്ടങ്ങള്‍ ലംഘിക്കപ്പെട്ടെന്നും നടപടിക്രമങ്ങളില്‍ വീഴ്ചയുണ്ടായെന്നും ചൂണ്ടിക്കാട്ടിയാണ് കേന്ദ്ര ഏജന്‍സിയുടെ അന്വേഷണം തേടിയത്.

പുതിയ മദ്യനയത്തിലൂടെ മദ്യമാഫിയക്ക് 144 കോടിയുടെ ആനുകൂല്യം ലഭിച്ചെന്നും റിപ്പോര്‍ട്ടില്‍ പരാമര്‍ശമുണ്ട്. കേസില്‍ ഡല്‍ഹി ഉപമുഖ്യമന്ത്രി മനീഷ് സിസോദിയയെ കേന്ദ്രീകരിച്ച് അന്വേഷണം നടക്കുമെന്നാണ് സൂചന.