കർണാടകാ പ്രദേശ് കോൺ​ഗ്രസ് കമ്മറ്റി അധ്യക്ഷൻ ഡി കെ ശിവകുമാറിൻ്റെ വസതിയിൽ സിബിഐ റെയ്ഡ്. റെയ്ഡിൽ നിരവധി രേഖകൾ പിടിച്ചെടുത്തു. നേരത്തെ രജിസ്റ്റർ ചെയ്ത കള്ളപ്പണം വെളുപ്പിക്കൽ, അനധികൃത സ്വത്ത് സമ്പാദന കേസുമായി ബന്ധപ്പെട്ട് സി ബി ഐ നടത്തിയ പരിശോധനയിലാണ് രേഖകൾ പിടിച്ചെടുത്തത്. ഇന്നലെ വൈകിട്ടും രാത്രിയുമായാണ് പരിശോധന നടന്നത്. കനകപുരയിലെ വസതിയിലായിരുന്നു പരിശോധന.

ശിവകുമാറിൻ്റെ സ്വത്തുക്കളും അവയുമായി ബന്ധപ്പെട്ട രേഖകളും പരിശോധിച്ചതായി സംസ്ഥാന കോൺഗ്രസ് മേധാവിയുടെ ഓഫീസ് പുറത്തിറക്കിയ പ്രസ്താവനയിൽ പറഞ്ഞു. 2017ൽ അനധികൃത സ്വത്ത് സമ്പാദന കേസിൽ ശിവകുമാറിനെ പ്രതി ചേർത്തിരുന്നു. ഡൽഹി, മഹാരാഷ്ട്ര, കർണാടക എന്നീ മൂന്ന് സംസ്ഥാനങ്ങളിലെ ശിവകുമാറുമായി ബന്ധപ്പെട്ട 14 വസ്‌തുവകകളിൽ റെയ്ഡ് നടത്തിയിരുന്നു. റെയ്ഡിന് ശേഷം 75 കോടി രൂപ ഇയാൾ അനധികൃതമായി കെെക്കലാക്കിയിട്ടുണ്ടെന്നും സിബിഐ അറിയിച്ചിരുന്നു.