സംഘപരിവാർ, ആർഎസ്എസ്, ബിജെപി എന്നിവർ എല്ലാം ബിസിനസാക്കി മാറ്റുകയാണെന്നും അതുവഴി അഴിമതി വളർത്തുകയാണെന്നും സിപിഐഎം ജനറൽ സെക്രട്ടറി എം.എ. ബേബി ആരോപിച്ചു. ഡൽഹിയിൽ കോക്രോച്ച് ജനതാ പാർട്ടിയെ (സിജെപി) പിന്തുണച്ച് നടന്ന പരിപാടിയിൽ സംസാരിക്കുകയായിരുന്നു അദ്ദേഹം.
അയോധ്യയിലെ രാമക്ഷേത്ര നിർമാണത്തെ ചൂണ്ടിക്കാട്ടിയ ബേബി, വർഗീയ വിഭജനം സൃഷ്ടിക്കുന്നതിനൊപ്പം അത് അഴിമതിക്കും വഴിവെച്ചതായി ആരോപിച്ചു. ഭക്തരുടെ സംഭാവനകളും ക്ഷേത്രത്തിലെ വിലപിടിപ്പുള്ള വസ്തുക്കളും തട്ടിയെടുത്തെന്ന ആരോപണങ്ങളാണ് ഇതിന് ഉദാഹരണമെന്ന് അദ്ദേഹം പറഞ്ഞു.
ഡൽഹിയിൽ വിദ്യാർഥികളും സിജെപി പ്രവർത്തകരും നടത്തിവരുന്ന പ്രതിഷേധം പ്രവേശന പരീക്ഷകളുടെ നടത്തിപ്പിലെ ക്രമക്കേടുകളുടെയും അഴിമതിയുടെയും ഫലമാണെന്നും ബേബി ആരോപിച്ചു. പരീക്ഷാ സംവിധാനങ്ങൾ പോലും ലാഭമുണ്ടാക്കുന്ന ബിസിനസായി മാറ്റിയിരിക്കുകയാണെന്ന് അദ്ദേഹം വിമർശിച്ചു.
“സംഘപരിവാർ, ആർഎസ്എസ്, ബിജെപി എന്നിവർ രാജ്യത്തെ എല്ലാ മേഖലകളെയും വാണിജ്യവൽക്കരിക്കുകയാണ്. അതാണ് അഴിമതിക്കും ജനങ്ങളുടെ ദുരിതങ്ങൾക്കും കാരണമാകുന്നത്,” എം.എ. ബേബി പറഞ്ഞു.
