വന്ദേമാതരം പൂർണമായി ആലപിക്കുന്ന നിലപാട് ആർഎസ്എസിന്റെ അജണ്ടയാണെന്ന് പ്രതിപക്ഷ നേതാവ് പിണറായി വിജയൻ. തങ്ങൾക്കെതിരായ പ്രചാരണങ്ങൾ വിശ്വസിക്കുന്നവരോട് ഒരു ചോദ്യം ചോദിക്കാനുണ്ടെന്നും അദ്ദേഹം പറഞ്ഞു. യുഡിഎഫ് സർക്കാർ സത്യപ്രതിജ്ഞ ചെയ്ത വേദിയിൽ വന്ദേമാതരം പൂർണമായി ആലപിച്ചുവെന്നും, അതേ സാഹചര്യത്തിൽ എൽഡിഎഫ് സർക്കാർ ആയിരുന്നെങ്കിൽ അങ്ങനെ ചെയ്യുമായിരുന്നോ എന്നും അദ്ദേഹം ചോദിച്ചു.
വന്ദേമാതരം പൂർണമായി ആലപിക്കാനുള്ള യുഡിഎഫ് സർക്കാരിന്റെ നിർബന്ധത്തിന് പിന്നിലെ കാരണം എന്താണെന്നും പിണറായി വിജയൻ ചോദിച്ചു. പ്രോട്ടോക്കോൾ പാലിക്കുകയാണെന്ന ന്യായീകരണം ജനങ്ങളെ തെറ്റിദ്ധരിപ്പിക്കാനുള്ള ശ്രമമാണെന്നും, പരിപാടി സംഘടിപ്പിക്കുന്നത് സംസ്ഥാന സർക്കാരായതിനാൽ തീരുമാനങ്ങളും സർക്കാരിന്റെതാണെന്നും അദ്ദേഹം ചൂണ്ടിക്കാട്ടി.
അതേസമയം, സിയോണിസവും ആർഎസ്എസും ഒരേ നാണയത്തിന്റെ രണ്ട് വശങ്ങളാണെന്നും അദ്ദേഹം ആരോപിച്ചു. രാഷ്ട്രീയ-സാമൂഹിക വിഷയങ്ങളിൽ ഇരുകൂട്ടരുടെയും നിലപാടുകൾക്ക് വലിയ സാമ്യമുണ്ടെന്നും, വിദ്വേഷത്തിലും അപരവൽക്കരണത്തിലും അധിഷ്ഠിതമായ ആശയങ്ങളാണ് ഇവരെ ഒന്നിപ്പിക്കുന്നതെന്നും അദ്ദേഹം പറഞ്ഞു.
