സെക്രട്ടേറിയറ്റ് മാർച്ചുമായി ബന്ധപ്പെട്ട കേസിൽ എസ്.എഫ്.ഐ നേതാക്കളെ അറസ്റ്റ് ചെയ്തതിനെ തുടർന്ന് തലസ്ഥാനത്ത് വീണ്ടും സംഘർഷാവസ്ഥ. എസ്.എഫ്.ഐ കേന്ദ്ര കമ്മിറ്റി അംഗം എസ്.കെ. ആദർശിനെയും സംസ്ഥാന കമ്മിറ്റി അംഗം ടോണി കുര്യാക്കോസിനെയും പൊലീസ് അറസ്റ്റ് ചെയ്തു. ഇതിൽ പ്രതിഷേധിച്ച് ഡി.വൈ.എഫ്.ഐ നടത്തിയ കന്റോൺമെന്റ് പൊലീസ് സ്റ്റേഷൻ മാർച്ച് സംഘർഷത്തിൽ കലാശിച്ചു. പ്രതിഷേധക്കാർ ബാരിക്കേഡുകൾ തള്ളിമാറ്റാൻ ശ്രമിച്ചതോടെ പൊലീസ് ജലപീരങ്കി പ്രയോഗിച്ച് പ്രതിഷേധം തടഞ്ഞു.
സെക്രട്ടേറിയറ്റ് മാർച്ചിനിടെ പരിക്കേറ്റ എസ്.എഫ്.ഐ പ്രവർത്തകർ ചികിത്സയിൽ കഴിയുന്ന സ്വകാര്യ ആശുപത്രിയിലെത്തിയപ്പോഴാണ് എസ്.കെ. ആദർശിനെയും ടോണി കുര്യാക്കോസിനെയും പൊലീസ് കസ്റ്റഡിയിലെടുത്തത്. എസ്.എഫ്.ഐ സംസ്ഥാന സെക്രട്ടറി പി. സഞ്ജീവിനെ സന്ദർശിക്കാനെത്തിയ ഇരുവരെയും വൈകിട്ട് ഏഴുമണിയോടെയാണ് ആശുപത്രിക്ക് മുന്നിൽ നിന്ന് അറസ്റ്റ് ചെയ്തത്.
മാർച്ചിനിടെ പരിക്കേറ്റ പി. സഞ്ജീവ് ആശുപത്രിയിൽ ചികിത്സയിലായിരുന്നു. നെഞ്ചിൽ ഉൾപ്പെടെ മർദനമേറ്റ സഞ്ജീവിനെ ആശുപത്രിയിൽ നിന്ന് ഡിസ്ചാർജ് ചെയ്യുന്ന സമയത്താണ് പൊലീസ് ആശുപത്രി കോമ്പൗണ്ടിൽ കയറി ഇരുവരെയും കസ്റ്റഡിയിലെടുത്തത്.
അറസ്റ്റിലായ ആദർശിനെയും ടോണി കുര്യാക്കോസിനെയും ആദ്യം എ.ആർ ക്യാമ്പിലേക്കും തുടർന്ന് ഫോർട്ട് ആശുപത്രിയിൽ വൈദ്യപരിശോധനയ്ക്ക് വിധേയരാക്കിയ ശേഷമാണ് തുമ്പ പൊലീസ് സ്റ്റേഷനിലേക്ക് മാറ്റിയത്.
നേതാക്കളുടെ അറസ്റ്റിൽ പ്രതിഷേധിച്ച് ഡി.വൈ.എഫ്.ഐ പ്രവർത്തകർ കന്റോൺമെന്റ് പൊലീസ് സ്റ്റേഷനിലേക്ക് മാർച്ച് നടത്തി. സ്റ്റേഷനു മുന്നിലെ ബാരിക്കേഡുകൾ പ്രതിഷേധക്കാർ തള്ളിമറിക്കാൻ ശ്രമിച്ചതോടെയാണ് പൊലീസ് ജലപീരങ്കി പ്രയോഗിച്ച് പ്രതിഷേധക്കാരെ പിരിച്ചുവിട്ടത്.
സെക്രട്ടേറിയറ്റിലേക്ക് എസ്.എഫ്.ഐ നടത്തിയ മാർച്ചിലുണ്ടായ സംഘർഷത്തിന് പിന്നാലെ തുടർച്ചയായ അറസ്റ്റ് നടപടികളും പ്രതിഷേധങ്ങളും തുടരുകയാണ്. നേരത്തെ വനിതാ പ്രവർത്തകർ ഉൾപ്പെടെ നിരവധി പേർക്ക് പരിക്കേറ്റ സംഭവവും പൊലീസ് നടപടിയും വിവാദമായിരുന്നു. പുതിയ അറസ്റ്റുകളും തുടർന്നുണ്ടായ പ്രതിഷേധങ്ങളും തലസ്ഥാനത്തെ രാഷ്ട്രീയ അന്തരീക്ഷം വീണ്ടും സംഘർഷഭരിതമാക്കിയിരിക്കുകയാണ്.
