സംസ്ഥാന നിയമസഭയിൽ ഗവർണർ നയപ്രഖ്യാപന പ്രസംഗം വെട്ടിച്ചുരുക്കിയ നടപടിയെ വിമർശിച്ച് എൽ‍ഡിഎഫ് നേതാക്കൾ. നയപ്രഖ്യാപനം വെട്ടിച്ചുരുക്കിയത് ആരോഗ്യപ്രശ്നങ്ങൾ കൊണ്ടാകാമെന്ന് മന്ത്രി സജി ചെറിയാൻ അഭിപ്രായപ്പെട്ടു. നടപടിയിൽ രാഷ്ട്രീയം കാണുന്നില്ലെന്നും സജി ചെറിയാൻ കൂട്ടിച്ചേർത്തു.

എന്നാൽ ഗവർണർ കേന്ദ്രത്തിന്റെ കളിപ്പാവയാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം പറഞ്ഞു.
ഗവർണർ രാഷ്ട്രീയം കളിക്കുന്നു. നയപ്രഖ്യാപനം അത് നടത്തുന്നയാളുടെ ജനാധിപത്യബോധത്തെ ആശ്രയിച്ചിരിക്കുമെന്നും ബിനോയ് വിശ്വം കുറ്റപ്പെടുത്തി. ഒരു മിനിറ്റ് 24 സെക്കൻഡിൽ ഗവർണർ ആരിഫ് മുഹമ്മദ് ഖാൻ തന്റെ നയപ്രഖ്യാപനം പ്രസംഗം അവസാനിപ്പിച്ചത് നിയമസഭയെ അമ്പരപ്പിച്ചിരുന്നു.