ഇന്ത്യയില്‍ കോവിഡ് -19 കേസുകള്‍ വര്‍ദ്ധിക്കുന്നതായി റിപ്പോര്‍ട്ട്. ഇതില്‍ ഭൂരിഭാഗവും കേരളം, മഹാരാഷ്ട്ര, ഗുജറാത്ത്, തമിഴ്‌നാട് തുടങ്ങിയ സംസ്ഥാനങ്ങളില്‍ നിന്നാണെന്നും റിപ്പോര്‍ട്ടില്‍ പറയുന്നു. ഒമിക്രോണ്‍ പരമ്പരയില്‍ പെട്ട ‘പിറോള’ സ്ട്രെയിന്‍ എന്നും അറിയപ്പെടുന്ന BA.2.86 ന്റെ JN.1 ഉപ വകഭേദമാണ് പുതിയ കേസുകളുടെ വര്‍ദ്ധനവിന് കാരണം.

ഈ വൈറസ് നിലവിലുള്ള പ്രതിരോധശേഷിയെ തളര്‍ത്തുമെന്നും മനുഷ്യരില്‍ നിന്ന് മനുഷ്യരിലേക്ക് ഇവ വേഗത്തില്‍ പടരുമെന്നും വിദഗ്ദ്ധര്‍ ആശങ്ക പ്രകടിപ്പിച്ചിട്ടുണ്ട് . മാത്രമല്ല, ഒമിക്രോണുമായി ബന്ധപ്പെട്ട ലക്ഷണങ്ങള്‍ തന്നെയാണ് പിറോള വൈറസിന് ഉള്ളതെന്നും ഡല്‍ഹിയിലെ ഇന്ദ്രപ്രസ്ഥ അപ്പോളോ ആശുപത്രിയിലെ പകര്‍ച്ചവ്യാധി വിദഗ്ധന്‍ ഡോ. ജതിന്‍ അഹൂജ പറഞ്ഞതായി ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തു.

JN.1 വേരിയന്റിനെക്കുറിച്ച് കൂടുതലറിയണോ?

COVID-19 ന്റെ ഒമിക്രോണ്‍ വകഭേദത്തിന്റെ ഒരു പതിപ്പാണ് JN.1, അതിന്റെ ഘടനയില്‍ ഏകദേശം 30 മാറ്റങ്ങളുണ്ട്. ഈ മാറ്റങ്ങള്‍ അതിനെ കൂടുതല്‍ അപകടകരമാക്കണമെന്നില്ല, പക്ഷേ അവ വൈറസ് നമ്മുടെ രോഗപ്രതിരോധ സംവിധാനത്തെ തകര്‍ത്തുകളയും. വൈറസ് നമ്മുടെ കോശങ്ങളിലേക്ക് പ്രവേശിക്കാന്‍ ഉപയോഗിക്കുന്ന സ്‌പൈക്ക് പ്രോട്ടീനിലാണ് മാറ്റങ്ങള്‍ ഉണ്ടാക്കുക.

വാക്‌സിന്‍ പ്രതിരോധശേഷി കുറയുന്നതിനാല്‍ ‘പിറോള’യുടെ ഒരു ഭീഷണിയാണോ?

ഒമിക്രോണ്‍ തരംഗം ആരംഭിച്ചിട്ട് കുറച്ചു കാലമായെങ്കിലും, നമ്മുടെ രോഗപ്രതിരോധ സംവിധാനത്തിലെ മെമ്മറി ടി സെല്ലുകള്‍ക്കും ബി സെല്ലുകള്‍ക്കും ഇപ്പോഴും അതിനെ ചെറുക്കാന്‍ കഴിയും. ഈ കോശങ്ങള്‍ മുന്‍കാല അണുബാധകളില്‍ നിന്നോ വാക്‌സിനുകളില്‍ നിന്നോ വൈറസിനെ ചെറുക്കുന്നു. ഇത് രോഗത്തിന്റെ തീവ്രത കുറയ്ക്കാന്‍ സഹായിക്കുന്നു.

ആരാണ് കൂടുതല്‍ ശ്രദ്ധിക്കേണ്ടത്?

അനിയന്ത്രിതമായ പ്രമേഹം, വിട്ടുമാറാത്ത വൃക്കരോഗം, എച്ച്‌ഐവി തുടങ്ങിയ ആരോഗ്യപ്രശ്‌നങ്ങളുള്ളവര്‍, അല്ലെങ്കില്‍ വൃക്ക മാറ്റിവയ്ക്കല്‍ ശസ്ത്രക്രിയ കഴിഞ്ഞവര്‍ എന്നിവര്‍ കൂടുതല്‍ ശ്രദ്ധിക്കേണ്ടതുണ്ട്. പ്രായമായവര്‍, ഗര്‍ഭിണികള്‍, കുട്ടികള്‍ എന്നിവരും കൂടുതല്‍ അപകടസാധ്യതയുള്ളവരാണ്.