സഹോദരിയാണെന്ന് പറഞ്ഞ് ജ്വല്ലറികളിൽ നിന്ന് യുവതി സ്വർണാഭരണങ്ങളും 10 കോടി രൂപയും തട്ടിയെടുത്ത കേസിൽ ചോദ്യം ചെയ്യാനായി ഉപമുഖ്യമന്ത്രി ഡി.കെ ശിവകുമാറിനും സഹോദരനും മുൻ എംപിയുമായ ഡി.കെ സുരേഷിനും എൻഫോഴ്സ്മെന്റ് ഡയറക്ടറേറ്റ് (ഇ.ഡി) സമൻസ് അയച്ചു. ജൂൺ 19ന് ഹാജരാകണമെന്നാണ് നോട്ടീസിലെ ആവശ്യം.

ഡി.കെ സുരേഷിന്റെ സഹോദരിയാണെന്ന് പരിചയപ്പെടുത്തി ജ്വല്ലറി നടത്താനെന്ന വ്യാജേന സ്വർണാഭരണങ്ങൾ വാങ്ങി വ്യാപാരികളെ കബളിപ്പിച്ചതിന് ഐശ്വര്യ ഗൗഡ (33) യെ ഏപ്രിലിൽ ഇ.ഡി അറസ്റ്റ് ചെയ്തിരുന്നു. ഇവരുമായി സാമ്പത്തിക ഇടപാട് നടത്തിയെന്നാരോപിച്ച് കോൺഗ്രസ് എംഎൽഎ വിനയ് കുൽക്കർണിയുടെ വീട്ടിലും റെയ്ഡ് നടത്തിയിരുന്നു.

തന്റെ പേര് ദുരുപയോഗിച്ചതിനെതിരെ ഐശ്വര്യ ഗൗഡയ്ക്കെതിരെ ഡി.കെ സുരേഷ് നേരത്തേ തന്നെ പൊലീസിൽ പരാതി നൽകിയിട്ടുണ്ട്. ഇ.ഡിയുടെ ഈ നടപടി രാഷ്ട്രീയ പക പോക്കലാണെന്നാണ് സർക്കാർ നിലപാട്.