കൂത്തുപറമ്പ് വെടിവെപ്പുമായി ബന്ധപ്പെട്ട് ഡിജിപി റവാഡയ്‌ക്കെതിരെ ഉയരുന്ന ആരോപണങ്ങൾ അടിസ്ഥാനരഹിതം എന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ മാസ്റ്റർ . വെടിവെപ്പ് നടന്നത് യുഡിഎഫ് സർക്കാരിന്റെ കാലത്താണ്.സംഭവത്തിന് രണ്ട് ദിവസം മുൻപ് മാത്രമാണ് റവാഡ ചന്ദ്രശേഖർ ചുമതലയേറ്റത്. അദ്ദേഹത്തെ കോടതി കുറ്റവിമുക്തനാക്കിയതുമാണ്

എന്നാൽ ഡിജിപി നിയമനത്തിൽ ബോധപൂർവ്വം പ്രശ്നമുണ്ടാക്കാനാണ് ചിലർ ശ്രമിക്കുന്നതെന്നും എംവി ഗോവിന്ദൻ പറഞ്ഞു. പട്ടികയിലെ മറ്റു പേരുകളേക്കാൾ സ്വീകാര്യനായത് കൊണ്ടാണ് റവാഡയെ തെരഞ്ഞെടുത്തത്. കേന്ദ്ര സർക്കാരും സംസ്ഥാന സർക്കാരുമാണ് ഡിജിപിയെ തീരുമാനിക്കുന്നത്. അതിൽ പാർട്ടിക്ക് പങ്കില്ലെന്നും പാർട്ടി ക്ലീൻചിറ്റ് നൽകേണ്ട കാര്യമില്ലെന്നും എംവി ഗോവിന്ദൻ മാസ്റ്റർ പറഞ്ഞു.

ഡിജിപി നിയമനവുമായി ബന്ധപ്പെട്ട കെസി വേണുഗോപാൽ ഉയർത്തിയ വിമർശനങ്ങൾക്ക് മറുപടി അർഹിക്കുന്നില്ല എന്നും അദ്ദേഹം പറഞ്ഞു. പി ജയരാജൻ ഡിജിപി നിയമനത്തിൽ എതിർപ്പ് പ്രകടിപ്പിച്ചിട്ടില്ലെന്നും എംവി ഗോവിന്ദൻ മാസ്റ്റർ വ്യക്തമാക്കി.